DILI, STLTIMORLESTE.com – Prezidente Republika (PR), Jose Ramos Horta husu ema hotu partisipa eventu Dili Internasional Marathon realiza fulan Outubru, hodi fo Solidariedade ba povu palestina.
Prezidente Republika Jose Ramos Horta hatoo kestaun nee liu husi mensajen iha palasiu Prezidensial Nikolao Lobato Bairru Pite Sabadu (02/08/2025) husu ema hotu atu partisipa eventu Dili Internasional Marathon realiza fulan Outubru hodi fo solidariedade ba povu palestina.
Prezidente Republika, Jose Ramos Horta husi mensajen hatete, ho laran haksolok mak nia konvida ema hotu-hotu ba Dili Internasional Marathon 2025 neebe sei halao iha loron 11 fulan Outubru.
Prezidente Republika hatete eventu tinan ida nee lori mensajen importante mak halai ba palestina, apelu ida ba pas no solidariedade global.
“Iha tempu hanesan nee, ita selebra pasu istoriku ida, Timor-Leste nia adezaun ba ASEAN. Hamutuk mai ita halai ba unidade, ba reziliensia, ba esperansa,” dehan PR Horta.
Nia esplika, halai nee sei hahu no remata iha Palasiu Prezidensial Nicolau Lobato, iha neeba atleta rihun ba rihun sei halibur iha dadersan nakukun, karik imi partisipa Marathon kompletu, meia Marathon, halai ba atleta sira ka halai ba pas, imi nia pasu sira sei hatudu servisu kompromisu hamutuk ba futuru ida neebe diak liu.
Nunee, ba vizinhu sira ASEAN, ami hatoo konvite espesial ida, odamatan nakloke, no konvite sei too iha tempu badak, imi nia Federasaun Atletismu, mai halai hamutuk ho Timor, iha espiritu amizade no solidaridade ba atleta nasional sira.
“Hau halo votus susesu ba imi nia preparasaun, orgullu no hein katak Ita nia preparasaun sai inspirasaun ba ita nia povu no nasaun. Ba povu tomak Timor Leste, mai ita hakonu dalan sira ho haksolok, mai ita halai, laos deit ba liña final, maibe pas ba ASEAN, ba unidade. Mai ita hamutuk iha fulan Outubru DILI Internasional Marathon 2025, halai ba pas no solidaridade halai ba palestina,” tenik nia.
Nunee mos Ministru Juventude Desportu Arte no Kultura (MJDAK), Nelio Izac hatete Prezidente Republika ho Governu liu husi Ministeriu Juventude Desportu Arte no Kultura, hakarak uza oportunidade atu fo hatene ba publiku halo lansamentu ba atividade neebe atu halo iha Outubru, bolu Dili Internasional Marathon.
Ministru dehan Dili Internasional Marathon nee inisitiva ida husi Prezidente Republika, servisu hamutuk ho Governu liu husi MJDAK, neebe mai ho hanoin rua, hanoin dahuluk tanba TL iha prosesu iha dalan atu integra ba membru ASEAN, uza Dili Internasional Marathon nee hanesan mos espasu ida atu ba iha neeba.
“Ita mos hatene katak, husi mundu hotu-hotu triste, tanba konflitu iha rai bara-barak mak Dili Internasional Marathon nee ita bolu dehan, ita halai ba palestina. Nee hanesan meius solidaridade povu Timor ba sofrimentu neebe povu Palestina infrenta oras nee daudaun,” informa MJDAK,
Ministru dehan mensajen ba mundu katak, nafatin promove dialogu, nunee hakiak nafatin paz no dame iha mundu. No eventu Dili Internasional Marathon nee iha misaun ba ida nee. Komesa husi lansamentu husi Federasaun Atletismu, nunee mos Prezidente Republika, hahu halo rejistrasaun ba atleta sira neebe hakarak partisipa iha eventu nee.
objetivu prinsipal ida mos atu uza meius nee ba tama ba membru ASEAN mak konvidadu atleta sira neebe sei partisipa iha eventu nee mak atleta sira husi país membru ASEAN deit mak sei hetan oportunidade mai Timor partisipa Dili Internasional Marathon nee.
Tanba iha Dili Internasional Marathon iha numeru haat, neebe atu uza ba kompetensia ida Marathon nivel internasional, meia Marathon neebe 21 killometru, nunee mos 10 kilometru ba ema ho difisiensia no mos jeral. Maibe, rejista rua, rejista liu husi online, rejista ida liu husi Federasaun Atletismu, nunee too loron ikus bele dehan data ba kompetisaun nee 11 Outubru 2025.
Nia reforsa, halai taru sei hahu oras tuku 06:00 dadersa, neebe atleta sira neebe hakarak partisipa bele prepara an mak sedu nunee partisipa. Tanba nee husu ba komunidade sira neebe hela iha Dili, rute neebe atleta sira sei halai liu atu ema hotu-hotu, fo suporta, apoiu nunee atleta sira bele halai kondisaun neebe diak too termina kompetisaun iha oras 08:00 ka 10:00, tanba hahu husi Palasiu Prezidensial, entaun sei remata iha Palasiu Prezidensial.
Iha fatin hanesan, Xefe Kaza Sivil Prezidensia Republika, Jezuina Maria Ferreira hatutan, Prezidente Republika mak sai patronu ba iha Dili Internasional Marathon, no eventu nee anula Prezidensia Republika. Tanba nee mak kada tinan Prezidensia Republika prevee orsamentu kada tinan Dili Internasional Marathon.
Nia haktuir, ba tinan 2025 Prezidensia Republika prevee rihun US$ 100. Husi enkontru hamutuk entre Sekretariadu, Prezidensia Republika, Federasaun Atletizmu halo proposta orsamentu neebe aprezenta ba Prezidente Republika proposta nee ho montante US$ 170.290.
Nia afirma, husi rihun US$ 70 resin nee kontribui husi MJDAK no mos husi Vise Primeiru Ministru Asuntu Ekonomiku.
“Ita mos sei hasai konvite nunee buka sponsor ba eventu Dili Internasional Marathon nee. Ba manan nain sira, sira sei simu premiu montante osan no mos ho medalla ida nee mak ita sei fo ba manan sira tuir idak-idak nia kategoria, ba labarik kiik oan sira neebe kontribui halo rame Dili Internasional Marathon nee ita sei fo premiu ba labarik sira tuir nesesidade labarik sira nian duni,” haktuir nia.
Nia hatutan, kona-ba premiu montante orsamentu husi US$ 2 resin too rihun US$ 8, ba internasional sira hetan primeiru lugar, segundu too terseiru maibe kategoria Timor husi primeiru too desimu lugar nee husi rihun US$ 8 too rihun US$ 200.
(eme)
