DILI, STLTIMORLESTE.com – Prezidente Republika (PR), Jose Ramos Horta hatete, desizaun supremu Tribunal la haruka fila Fujitivu Arnolfo Teves, desizaun polítika Timor Leste nian.
Prezidente Republika (PR), José Ramos Horta hatoo kestaun nee ba jornalista sira iha Palasiu Prezidensial Nicolao Lobato, Bairo Pite, Tersa (25/03/2025).
“Buat ida mak nee, ita boot sira lee didiak Tribunal nia desizaun, hau la komenta, respeita. Hau reuniaun tiha ona ho Primeiru Ministru pontu de vista tekniku juridiku, Tribunal nia opiniaun nee loos, maibe Tribunal pronunsia deit, bele halo estradisaun ka lae, Tribuna la hatete, se nia bele hela iha Timor ka lae, fo direitu ba nia atu hela iha Timor ka lae,” katak PR Horta.
Prezidente Republika hatete, ida nee desizaun polítika Timor Leste nian.
Ida nee iha implikasaun ka lae ba Timor Leste nia adezaun ASEAN, hatan ba kestaun nee, PR Horta hatete, laiha impaktu, buat sira nee normal akontese.
Foin lalais Fujitivu Arnolfo Teves Junior konsidera sistema Justisa Timor Leste diak liu kompara ho nia nasaun orijen Filipina, tanba desizaun Supremu Tribunal Justisa la halo estradisaun atu fila ba nia nasaun orijen.
“Hau moe tanba Ministru Justisa Filipina hatete aat kona-ba sistema Judisial Timor Leste, sira dehan desizaun nee sala, maibe realidade sistema Judisial Timor Leste diak liu kompara ho sistema Judisial iha Filipina,” dehan Arnolfo Teves.
Foin lalais desizaun Supremu Tribunal Justisa iha desizaun nee, Tribunal rekursu bazeia ba artigu 35 numeru 3 husi Konstituisaun RDTL, hodi indefere ba pedidu estradisaun. No plenariu husi Juizes Tribunal Rekursu delibera, unanimidade tuir fundamentu artigu 35 numeru 3 iha Konstituisaun RDTL, rekuza pedidu estradisaun ba Arnolfo Alipit Teves Junior.
(eme)
