DILI, STLTIMORLESTE.com – Prezidente Republika (PR), Jose Ramos Horta hatete, nia la preokupa deputadu sira hakilar malu iha Parlamentu Nasional (PN) hodi hamosu dezentendimentu, maibe ikus sira kaer liman fila fali deit.
Prezidente Republika Jose Ramos Horta hatoo lia hirak nee ba jornalista sira hafoin vizita Autoridade Munisípiu Dili Kaikoli, Kuarta (15/10/2025).
PR Horta hatete, nia la preokupa ho atitude deputadu no depuatada sira iha Parlamentu Nasional neebe hakilar malu, tanba sira hakilar malu tiha sai sira kaer liman fila fali deit, tanba nee Xefe Estadu ladun preokupa.
“Reprezentante povu sira hakilar malu laos akontese iha Timor Leste deit, maibe iha nasaun seluk mos akontese hotu, ida nee demokrasia nia hahalok mak nunee ona,” hatete PR.
PR dehan, nee demokrasia nunee duni, hodikalan PR Horta haree televizaun Inglatera nian, deputadu sira raut malu aat loos.
Nia hatete, Prezidente Parlamentu Nasional stres los, nia duni sai tan fali Primeiru Ministru, nee nunka akontese iha istoria Inglatera nian.
“Agora mai iha Timor nian, nee husik ba sira hakilar malu ba, remata tiha sira sai kaer lima fali, nee mak hau la preokupa ho ida nee,” dehan PR Horta.
Tuir observasaun neebe mak STL hetan, deputadu sira neebe mak reprezenta povu iha uma fukun Parlamentu Nasional dala ruma iha debate ruma deputadu husi bankada opozisaun nomos bankada Governu sempre hakilar malu, balun ate baku malu maibe bainhira remata debate sai ba liur sira kontinua hase malu hanesan baibain.
Entretantu, foin lalais Deputadu Deker husi Partidu CRNT ho deputadu sira husi Partidu FRETILIN hakilar malu iha Parlamentu Nasional iha loron Tersa-feira, laos nee deit maibe antes nee mos deputadu sira hakilar malu.
Jornalista: Emerenciana Pinto
Editor: Xisto Mendonça
