DILI, STLTIMORLESTE.com – Prezidente Republika (PR), Jose Ramos Horta hatete, labele bandu negosiante faan iha Merkadu Munisipal Baukau, negosiante iha liberdade 100% faan iha neebe deit.
Prezidente Republika Jose Ramos Horta hatoo kestaun nee ba jornalista sira, bainhira remata akompanha jogu Voli Praia iha Lecidere, Tersa nee (22/07/2025).
“Timor nee ita uniku ema ruma husi Bobonaro bele ba loke negosiu iha Baukau no Lospalos ou bele ba halo negosiu iha neebe neebe deit, no husi Baukau bele ba loke negisiu iha Oekusi husi Dili bele ba Likisa, Balibo, neebe liberdade sirkulasaun 100% labele iha desizaun bandu,” katak Prezidente Republika Jose Ramos Horta.
Prezidente Republika Jose Ramos Horta hatete, nia seidauk hatene klaru kona-ba autoridade lokal atu haruka fila negosiante husi munisipiu seluk, maibe iha Konstituisaun Republika Demokratika Timor Leste fo dalan ema hotu bele halo negosiu iha neebe deit.
“Hau hatete deit nee ita nia konstituisaun, laos konstituisaun deit maibe ita nia kultura, lei buat hotu fo total liberdade, tanba iha Baukau nee komersiante husi Kelikai lubuk ida, no Kelikai sira nee servisu badinas los, iha Dili hau nia maun alin sira husi Maubisi, Aileu, Atsabe, Bobonaro, kiik oan sira kiak maibe badinas husi Oekusi loron-loron faan manu tolun no faan hahan maibe ba eskola, buat sira nee importante diak,” dehan PR Horta.
Iha biban nee Prezidente Republika hatoo nia saudasoens no hakoak ba negosiante hotu-hotu neebe ho barani no kosar been hodi buka osan nunee bele sustenta familia uma laran.
Foin lalais Sekretariu Munisipal Planeamentu Investimentu no Dezenvolvimentu, Eduardo Filipe Ximenes hateten, daudaun iha Munisipiu Baukau laiha ona negosiante ida faan sasan okupa espasu publiku liu-liu faan iha trotoar leten, tanba Autoridade Munisipiu liu husi ekipa konjunta muda hotu ona negosiante sira neebe durante nee halo negosiu iha merkadu Vila Nova, Beskem no Vila Antiga ba merkadu foun Tuanaun ka Merkadu Munisipal Baukau.
Maibe iha tempu badak Autoridade Munisipiu liu husi ekipa konjunta sei identifika hikas ba negosiante sira husi Munisipiu seluk neebe halao negosiu iha merkadu Munisipal ka merkadu Tuanau, tanba iha merkadu laran negosiante husi Munisipiu seluk transforma kios sai fali rezidensia.
“Iha tempu badak ita sei identifika fila fali ba negosiante neebe mai husi Munisipiu seluk sei haruka fila, tanba nee merkadu Munisipal, laos merkadu rejional, se merkadu rejional ok, Manatuto bele tama se se deit bele tama, maibe merkadu Munisipal ita fo uluk espasu ba vendedores lokal, laos temi tiha merkadu Munisipal simu fali Uatulari Uatukarbau mak tama fali halo tan uma iha laran,” hateten Eduardo liu husi diskursu iha salaun apuramentu Munisipiu Baukau, Kinta (17/07/2025).
Autoridade Munisipiu Baukau nia pozisaun, bandu negosiante sira husi Munisipiu seluk iha merkadu Munisipal ka merkadu Tuanau, tanba merkadu Munisipal atu akumula no fo espasu ba negosiante Baukau oan atu utiliza halo negosiu, merkadu Tuanau laos merkadu rejional nunee simu negosiante sira husi Munisipiu seluk okupa halo negosiu hodi hela permanente iha merkadu laran.
(eme)
