DILI, STLTIMORLESTE.com – Prezidente Republika (PR), Jose Ramos Horta hatete, nia lori Vendedora Sofia hasoru malu ho Sua Santidade Papa Leao XIV hodi hatudu ba publiku katak ema kiak ka kiik mos iha dignidade hanesan ho ema boot.
Prezidente Republika Jose Ramos Horta hatoo lia hirak nee liu husi nia diskursu, bainhira fila husi Vatikanu mai Dili iha Palasiu Prezidensial Nicolau Lobato, Bairo Pite Segunda (24/11/2025).
PR hatete, lori Tia Sofia Hornai dos Santos ba Vatikanu, ida nee laos premeira ves, maibe antes Prezidente viajen ba estranjeiru lori mos kliner, inklui xefe aldeia sira, ida nee hatudu ba publiku katak ema kiik mos iha dignidade hanesan. Ema hotu hanesan iha Maromak nia oin.
Prezidente lori Venddora nuudar jestu boot rekonhesimentu nasional nian, Prezidente Ramos Horta konvida pesoalmente Sofia Hornai dos Santos, inan ida no vendedora servisu nain iha dalan ninin, akompanha nia vizita estadu ofisial ba Vatikanu.
“Hau konvida ama akompanha hau, akompanha delegasaun nuudar konvidadu de Ondra ba hasoru Amu Papa iha Roma, nee Timor oan ida, laos ema boot, laos Prezidente, laos Primeiru Ministru, laos deputadu, maibe inan ida importante liu mak nia inan ida, inan feto, segundu oan barak, terseiru moris ho susar, iha mundu nee hau hatete laiha prezidente ida viajen lori ema neebe kiak, poder laiha tuur fatin laiha, kadeira ofisial laiha,” dehan PR Horta.
Prezidente Republika hatete, viajen ba rai liur laos primeira ves lori Tia Sofia, maibe uluk Prezidente vizita Estadu ba Brunei mos lori Xefe Aldeia nomos Aileba nain rua tolu, aleinde nee ba Xina, Singapura mos lori hotu aileba inklui ama ferik ida servisu kliner iha Prezidensia Republika nee.
Xefe Estadu hatete, durante nia viajen lori inan vendedora no kliner inklui xefe aldeia laos ba pasiar maibe aproveita ba hatudu ema kiik, ema kiak mos iha dignidade.
“Maibe hatudu ema kiik no ema kiak mos iha dignidade, sira nia estatutu mak ema nia estatutu ofisial mak ema, ema hotu hotu hanesan, moris ho dignidade, tenke kontinua moris ho dignidade mate ho dignidade, tanba nee mak lori ama Sofia ba Roma hasoru duni Amu Papa, depois Amu Papa mos dehan ba hau, nia faan saida, hau dehan nia faan modo faan aifuan,” dehan PR Horta.
Prezidente Republika hatete, halo enkontru ho Sua Santidade Papa Leao nain rua mesak, kardeal sira mos la tuir hotu enkontru, Prezidente ho Papa mesak koalia durante 30 minutu, maibe Prezidente labele koalia sai saida mak sira koalia. Maibe karik hakarak hatene saida mak Papa koalia, bele asesu husi media Vatikanu nia.
Aleinde nee Prezidente Republika hatete, iha 28 Novembru Timor Leste sei selebra tinan 50 proklamasaun Unilateral, atividade Governu prepara ona.
“28 Novembru ita selebra loron boot, atividade Governu prepara ona, Prezidensia mos prepara atividade balun, tanba nee orsida loraik hau ba tasi tolu ba loke eventu feira iha neeba,” dehan nia.
Nunee mos Tia Sofia Hornai dos Santos ho matan-been hatoo agradese ba Prezidente Republika Jose Ramos Horta neebe lori nia ba hasoru Sua Santidade Papa Leao iha Vatinaku.
“Agradese ba Prezidente, Maromak lori nia, bele lori hau too Amu Papa nia fatin hodi hasoru direitu Papa,” dehan Tia Sofia.
Jornalista: Emerenciana Pinto
Editor: Xisto Mendonça
