DILI, STLTIMORLESTE.com – Prezidente Republika (PR), Jose Ramos Horta louva Igreja Katolika Timor Leste (TL), neebe sai matadalan espiritual ba povu.
Prezidente Republika, Jose Ramos Horta hatoo lia hirak nee liu husi nia mensajen neebe lee husi Xefe Kaza Sivil Jesuina Maria F. Gomes iha Konferensia Nasional Movimentu Renovasaun Karizmatika Katolika Timor Leste iha CCD, Sabadu (22/02/2025).
Prezidente Republika hatete, nia louva knaar estraordinariu Igreja Katolika Timor Leste nian neebe sai matadalan ba espiritual ba povu.
“Prezidente rekonhese no louva knaar estraordinariu Igreja Katolika nian iha Timor Leste, aleinde sai matadalan espiritual ba ita nia povu, halao ona misaun inkomparavel iha area sosial, umanitaria no karidade nian,” katak PR Horta neebe lee husi Xefe Kaza Sivil.
Prezidente Republika hatete, iha tinan barak nia laran Igreja hamriik iha linha oin hodi apoia populasaun sira neebe vulneravel liu iha rejiaun sira neebe izoladu liu no entre sira neebe nesesitadu liu, hodi fo ba sira dignidade, esperansa no oportunidade.
“Iha saude, misaun Katolika no kongregasaun relijioza sira sai esensial hodi fornese servisu kuidadu saude nian no tau matan ba ema moras sira, liu-liu iha komunidade remota sira neebe asesu ba hospital limitadu hela. Iha edukasaun, Igreja sai hanesan ai-riin prinsipal ida ba dezenvolvimentu umanu, hodi fo ensinu ho kualidade no formasaun etika ba labarik no foin-sae rihun ba rihun, hodi prepara sira ba futuru ida diak liu,” katak PR Horta.
Xefe Estadu hatete, iha katekeze, Igreja kontinua tranzmite valor kristaun nian, promove dame, solidariedade no domin ba ema seluk. Servisu inkansavel husi dioseze, parokia no kongregasaun relijioza sira sai nuudar naroman esperansa ba ema sira neebe presiza liu.
Nia hatutan, Igreja sai ona refujiu lo-loos ba ema kiak sira, marjinalizadu sira, moras sira no sira neebe hasoru difikuldade, hodi reafirma beibeik ninia kompromisu ba Kristu nia hanorin kona-ba domin, mizerikordia no justisa sosial. Tanba nee, Estadu rekonhese no valoriza tebes misaun ida nee, no sira sei kontinua fo apoiu ba inisiativa sira neebe promove povu nia moris diak.
“Ohin ita reafirma ita nia kompromisu atu kontinua servisu hamutuk ho Igreja hodi harii Timor Leste ida neebe justu, solidariu no prosperu liu ba ema hotu,,” katak nia.
Atu Espíritu Santu kontinua fo naroman ba Movimentu ida nee no atu ita boot sira nia misaun kontinua fo fuan ba nasaun no povu nia diak.
(eme)
