DILI, STLTIMORLESTE.com – Prezidente Republika (PR), Jose Ramos Horta hatete, atu luta kontra korrupsaun difisil tebes, tanba nee instituisaun investigador sira hanesan KAK, PGR, PCIC, DIKN ho PNTL, tenke halao sevisu ho onestu.
“Hau atu hateten luta kontra korrupsaun difisil tebes-tebes, primeiru tenke iha instituisaun investigador sira hanesan KAK, PGR, PCIC, DIKN, PNTL, hotu-hotu tenke iha integridade onestu, imparsialidade, signifika, o la hili kor partidu politiku, se mak iha rai nee bele hateten ba hau katak, hateten ba sidadaun, PGR, PCIC, PNTL, KAK no Tribunal la tuir kor partidu politiku ruma,” dehan Xefe Estadu iha mensajen loron Mundial Anti Korrupsaun, neebe selebra iha salaun MF, Ai-tarak laran, Segunda (09/12/2024).
Xefe Estadu hatete, ema hirak investigador teknikamente tenke koretu tuir prosedimentu neebe obedese ba espiritu lei, no konstituisaun no kodigu prosesu penal.
Sira tenke kumpri hodi halo investigasaun, kuandu Advogadu hatama informasaun defende ninia kliente, informasaun neebe investigador sira simu no konsidera ou sira rejeita tiha, tanba la tuir sira nia hakarak, ida nee mak problema boot luta kontra anti korrupsaun.
Tanba korrupsaun nee sai dezafiu boot iha mundu, maibe laos iha deit Timor Leste, tinan-tinan Prezidente bele halo mensajen hanesan daudaun nee, ho esperansa katak, tinan 30 mai TL sei sai hanesan pais riku sira seluk, livre hosi korrupsaun, kuaze 90.9% laiha korrupsaun.
Iha fatin hanesan, Prokurador Jeral Republika, Alfonso Lopez dehan, asaun atu evita hamenus, kombate korrupsaun nee asaun koletivu, ida nee laos parte judisial PGR, Juis sira, pilares iha tolu iha tribunal mais hotu-hotu hamutuk kombate.
“Agora mundu ohin loron, ita la stile, mas mundu agora provoka ita atu viola lei, dala ruma fo hela ita nia salariu oituan mas ita tenke obriga aan atu moris diak fora ita nia kapasidade, entaun asaun kombate nee tenke konjuntu, tenke iha rekursu, finanseira, tenke iha formasaun diak, investigador tenke iha kualidade”, dehan nia.
Diretor Jeral PCIC, Vicente Fernandes Brito hatete, mensajen Prezidente Republika nian nee enkoraja instituisaun investigador sira, tanba ida nee kriteriu, tuir estadu de diretu tenke hanesan nee, servisu investigasaun tenke transparensia imparsialidade no izensaun.
(ter)
