DILI, STLTIMORLESTE.com – Prezidente Republika (PR) Jose Ramos Horta hatete, Orsamentu Jeral Estadu (OJE) ba tinan 2025 diak liu tau prioridade absolutu mak agrikultura no seguransa alimentar no sub nutrisaun ba kosok oan sira.
Prezidente Republika Jose Ramos Horta hatoo kestaun nee ba jornalista sira bainhira remata halo vizita privadu ba iha Australia no fila hikas mai Timor Leste iha Aeroportu Internasional Nicolao Lobato Komoro, Dili, Sabadu (12/10/2024).
Prezidente Republika hatete, OJE tinan 2025 fo prióridade absoluta ba area importante sira hanesan agrikultura, seguransa alimentar, sub-nutrisaun kosok oan sira, apoiu setor saude diak liu ba inan isin rua sira, haree bee moos ba komunidade sira hotu-hotu, hadia eskola sira neebe aat.
“OJE 2025 fo prioridade absoluta mak agrikultura, seguransa alimentar, sub-nutrisaun kosok oan sira, apoiu setor saude diak liu ba inan isin rua sira. Haree bee moos ba komunidade sira hotu-hotu, haree prioridade hadia eskola sira neebe aat nee, dezenvolvimentu rural mak prióridade,” dehan PR Horta.
PR Horta hatete, relasiona ho OJE ba tinan 2025, PR sei haree no lee didiak depois mak koalia ho Primeiru Ministru Kay Rala Xanana Gusmão.
“Mas hau seidauk haree OJE 2025, hau iha tiha kopia ona, maibe ba Australia laiha tempu atu estuda didiak, hau sei lee didiak depois mak koalia ho Primeiru Ministru fo hau nia opiniaun,” hatete PR Horta.
Konselhu Ministru liu husi ninia reuniaun estraordinaria iha 30 Setembru, horiseik aprova ona proposta Orsamentu Jeral Estadu ba tinan 2025 ho montante bilhaun US$ 2.6. Proposta Lei OJE 2025 nee aprezenta husi Ministra Finansas, Santina José Rodrigues Ferreira Viegas Cardoso, neebe aloka ba Administrasaun Sentral, Rejiaun Administrativa Espesial Oe-Cusse Ambeno (RAEOA) no Seguransa Sosial, inklui Fundu Rezerva Seguransa Sosial.
Tuir Komunikadu hatete, Proposta Lei OJE nian ba tinan 2025 kontinua estratejia implementasaun prioridade sira neebe hatuur iha Programa IX Governu nian, ho lema Investimentu iha infraestrutura estratejika sira, hametin ekonomia no hadia sidadaun sira nia moris diak.
Proposta nee formula bazeia ba Objetivu Estratejiku sira husi governu dasia, ho hanoin atu promove dezenvolvimentu sosio ekonómiku nasaun nian liu husi investimentu alvu sira iha infraestrutura estratejika, reforsu ekonomiku no inisiativa sira neebe ho objetivu atu hadia sidadaun sira nia moris diak.
(eme)
