DILI, STLTIMORLESTE.com – Prezidente Republika (PR), Jose Ramos Horta hatete, Padre Domingos Maubere nia kontribuisaun klean ba igreja no involvimentu makaas ba luta Timor Leste hetan ukun rasin aan.
Prezidente Republika Jose Ramos Horta hatoo kestaun nee liu husi nia diskursu iha komemorasaun loron 20 Maiu iha palasiu Prezidensial Nikolao Lobato, Bairo Pite, Tersa nee (20/05/2025).
Prezidente Republika hatete, Padre Domingos nia dedikasaun desiziva no reflete aliansa klean entre igreja Katolika no kauza Libertasaun Nasionl Timor Leste nian, nunee mos kompromisu metin atu harii sosiedade ida neebe bazeia ba justisa, dignidade umana no rekonsiliasaun.
“Padre Domingos Maubere (Amu Du) hau labele husik atu hatudu, iha tempu selebrasaun ida nee, koinsidensia neebe todan ho partida atu hamutuk ho Maromak Ita nia Nai husi saudozu Padre Domingos Soares, konhesidu hanesan Padre Maubere ka “Amu Du”. Hau iha privilejiu konhese pesoalmente Padre Maubere no mantein relasaun amizade klean ho nia, neebe marka ho proximidade no dilogu konstante iha tinan barak nia laran,” dehan Prezidente Republika.
Prezidente Republika hatete, nia hanoin hikas ho emosaun frekuensia sira nia kontaktu sira nian no ninia liafuan sira neebe sempre fo korajen, neebe dirije ba PR nia misaun publika no servisu ba bem-komun.
“Hau mos hanoin hikas dilijensia no persistensia neebe nia halo nia apelu sira too mai hau kuaze sempre liu husi mensajen sira WhatsApp nian hodi bolu atensaun ba realidade todan sira neebe esperiensia husi ema sira neebe vulneravel liu ema kiak sira, ema moras sira, ema eskluidu sira, sira neebe terus iha silensiu,” katak Horta.
PR Horta dehan, Padre halo denunsia, halo ezijensia, hodi sira neebe laiha lian nia naran, hodi husu intervensaun Prezidente Republika ka Governu nian atu hakmaan Timoroan barak tebes neebe hasoru kiak, malnutrisaun, eskluzaun sosil no falta oportunidade iha moris.
“Nee, sein-duvida, figura unika no laran luak, neebe ohin loron ita hanoin ho agradesimentu klean. Hau mos hakarak destaka ninia papel fundamental hodi organiza Sorumutuk Konselhu Nasionl Rezistensia Timorense (CNRT), neebe halao iha Peniche, Portugal, iha tinan 1998, enkontru ida neebe marka unidade no reafirmasaun ba ita nia povu nia luta ba autodeterminasaun no dame. Padre Domingos nia dedikasaun desiziva no reflete aliansa klean entre Igreja Katolika no kauza Libertasaun Nasional Timor-Leste nian, nunee mos kompromisu metin atu harii sosiedade ida neebe bazeia ba justisa, dignidade umana no rekonsiliasaun,” katak Horta.
Prezidente dehan, hin, bainhira ievoka nia memoria, hafoun kompromisu ba valor sira neebe nia moris no luta ba. Atu “Amu Du” deskansa ho hakmatek, hamutuk ho Aman Eternu, ida neebe hadomi tebes nia povu.
(eme)
