DILI, STLTIMORLESTE.com – Prezidente Republika (PR), Jose Ramos Horta hatete, Padre Maubere nia kontribuisaun luta hanesan mos Lider Karismatiku Xanana Gusmão no Lere Anan Timur, maske padre la kaer kilat.
Prezidente Republika Jose Ramos Horta hatoo kestaun nee ba jornalista sira bainhira remata vizita Tribunal Rekursu iha Kaikoli, Sesta (16/05/2025).
Nia hatete, Prezidente konhese diak Padre Maubere, no nia partisipasaun Luta hanesan mos Xanana no Lere.
“Hau konhese Amu Maubere nee kleur, hau hanoin lider sira hotu-hotu iha Timor Leste hau mak pasa tempu liu ho nia, mezmu uluk nia iha Malazia moras daudaun iha kama leten halo WhatsApp mai hau, litik hau kona-ba edukasaun ema kiak, buat sira hotu hatudu nia preokupasaun, mezmu moras nia la haluha povu kiik ema ida ke diak tebes ema ida simples, ema ida ulun fatuk toos, ulun fatuk toos sintidu ke nia hanoin buat ida lalika lakon tempu buka koalia oin seluk fali nia la muda, nia partisipasaun iha luta hanesan maun Xanana nia hanesan Lere, mezmu nia la kaer kilat, ” dehan Prezidente Republika.
Luta nee laos sira kaer kilat deit tinan hira nee nia laran, Prezidente ba too iha Padre nia aldeia ramelau hun nia mobiliza populasaun atus ba atus simu Prezidente Republika, maske antes nee Ramos laos Prezidente Republika.
Prezidente Republika sente triste tebes tanba Timor Leste lakon ema diak ida no eroi Timor Leste nia neebe kontribui makaas mos ba iha luta libertasaun nasional.
“Hau toba iha neeba sosa karau, fahi fahe ba sira han iha neeba koalia rona nia, portantu ba hau triste tebes, segundu ita lakon ema diak ida nia eroi ida nasional, hanesan mos padre seluk uluk Padre Mario Belo mate tiha ona, Padre Mario Belo nee mos nia kontribuisaun makaas ho padre seluk tan lubuk ida maibe Padre Domingos Maubere mak ativu los ema hotu konhese,” katak PR Horta.
Prezidente Republika hatete, padre no madre sira seluk mos kontribui makaas ba luta libertasaun nasional maibe Padre Maubere mak ativu liu.
“Amu Domingos Maubere ita labele sura, labele sukat ba nia kontribisaun ba rai ida nee,” katak Prezidente Republika.
(eme)
