DILI, STLTIMORLESTE.com – Prezidente Republika (PR), Jose Ramos Horta ladun preokupa ho labarik neebe faan sasan, importante liu mak labarik asesu edukasaun no sub nutrisaun Infantil.
Xefe Estadu hatoo kestaun nee ba jornalista sira bainhira remata halao lansamentu ba seminariu Internasional, neebe mak realiza husi PDHJ, iha Novu Turizmu, Kuarta (20/11/2024).
“Loron mundial ba labarik sira, se labarik sira faan deit sasan hanesan faan manu tolu, faan kripek, balun komesa faan hahan tula ba karreta sira ladun todan, hau la preokupa ho ida nee, tanba primeiru sira ba eskola. Sira ba eskola, bainhira eskola remata lokraik sira ajuda sira nia família ba faan liu-liu manu tolu. Barak liu labarik sira husi Oekusi, hau sempre sosa sira nia manu tolu lubuk ida, nee duni hau la preokupa ho ida nee, preokupa liu ho problema neebe boot liu sub-nutrisaun infantil,” katak PR, Horta.
Nutrisaun ba labarik tuir Xefe Estadu importante, tanba bainhira labarik laiha nutrisaun sira nia isin sei la dezenvolve.
“Labarik sira hahan laiha, hahan la sufisiente, kosok oan moris mai nee laiha nutrisaun, entaun isin ladun dezenvolve nee mak hau preokupa liu duke labarik oan sira faan iha estrada publiku, tanba ema la halo violensia ba sira,” hatete Xefe Estadu.
Maibe nia dehan, liga ho labarik neebe faan sasan kmaan ema barak simpatia ba sira, sosa sira nia manu tolu, labarik sira nee PR rasik koalia ho sira, dala ruma sira hatete rasik ohin hetan osan mais ema balu fo deit osan.
Iha biban nee, Provedor Direitu Umanu no Justisa (PDHJ), Virgilio da Silva Guterres “Lamuka” hatete, husi tinan ba tinan labarik
numeru aumenta moris iha dalan ninin hodi faan sasan.
“Buat importante neebe ita karega, imajen neebe ita haree husi tinan ba tinan, labarik sira komesa aumenta iha dalan atu buka moris faan sasan iha dalan publiku. Buat neebe lo-loos, tuir lei ka tuir Internasional sira neebe ita ratifika tiha bandu, ezemplu konvensaun direitu ba labarik nian fo proividu atu labarik halao servisu sira neebe hanesan ema adultu nian,” katak nia.
(eme)
