DILI, STLTIMORLESTE.com – Prezidente Republika (PR), Jose Ramos Horta hatete, nia mos rona pesoal saude balun utiliza ekipamentus Hospital Nasional Guido Valadares (HNGV) ba halo fali tratamentu pasiente iha Klinika Privadu sira, tanba nee Ministeriu Saude presiza investiga.
Prezidente Republika Jose Ramos Horta hatoo kestaun nee ba jornalista sira bainhira halo enkontru ho jornalista destakadu iha Palasiu Prezidensial Nikolao Lobato, Bairo Pite, Kuarta lokraik (02/07/2025).
Prezidente Republika hatete, informasaun sira nee rona tinan 15 liu ba, PR lembra koalia ho mediku balun sira hatete hakarak ba haree, ezemplu ema ba haree dentista iha Guido Valadares sira neebe servisu iha resepsionista hatete doutor laiha maibe doutor ida hein hela dientista hein hela kada vez nia husu ba sira dehan pasiente laiha, sira kuandu ba too iha resepsionista hatete imi tenke ba iha Klinika Privadu.
“Nee akontese duni, momentu neeba hatete duni doutor estranjeira nee katak o halo relatoriu ida se o lakohi lalika asina mos la buat ida, entrega ba hau entrega ba Governu, medikamentu ita rona desvia ba Klinika Privadu nee rona, agora importante mak Ministra Saúde ho Governu, liu-liu Primeiru Ministru direitamente ordena auditoriu ida makaas, labele ema ida, rua ka tolu tenke ekipa multipal para halo auditoriu ba buat sira nee hotu,” katak PR Horta.
Prezidente Rpublika hatete, kona-ba pesoal saude balun neebe utiliza ekipamentu husi HNGV hodi halo tratamentu pasiente iha Klinika Privadu sira, Prezidente Republika mos rona kleur, tanba nee Ministra Saude hamutuk ho Governu liu-liu Primeiru Ministru presiza ordena auditoriu.
“Presiza ekipa halo auditoriu ba buat sira nee, utilizasaun medikamentus HNGV nian no hospital ka klinika sira estadu afinal uza fali ba Klinika Privadu, buat sira nee tenke investiga,” katak PR Horta.
Xefe Estadu hatete, iha mos problema seluk tan iha Ministeriu Justisa nomos Terras Propriedade oras nee investigasaun halo daudaun ona, PR la temi instituisaun neebe mak halo investigasaun nee maibe evidensia iha ona, video, foto, ba faan pasaporte ba ema estranjeiru, buat sira nee akontese.
“Pasaporte neebe lakon, liu-liu pasaporte neebe lakon nee ba neebe? Nee pertense ba Governu ho SNI, PSIK no Prokurador Jeral Republika para halo investigasaun makaas,” katak PR Horta.
(eme)
