DILI, STLTIMORLESTE.com – Prezidente Republika (PR), Jose Ramos Horta hatete, kriasaun prezepiu sai hanesan espresaun klean ida kona-ba ema nia fiar, hodi hein prezensa Kosok Oan Jesus neebe moris iha Belem.
Xefe Estadu hatoo lia hirak nee liu husi abertura ba ezibisaun prezepiu hodi hamoris fila fali tradisaun Natal neebe apresiada iha nasaun ho feira merkadu lokal neebe vibrante, iha Palasiu Prezidensial, Nicolau Lobato, Kinta (12/12/2024).
Prezidente Republika dehan, ezibisaun aprezenta prezepiu hamutuk 77 neebe kria husi loron 29 fulan Novembru too loron 8 fulan Dezembru, ho prezepiu hamutuk 22 iha kategoria ba labarik sira (tinan 16 ba kraik) no 55 iha kategoria publiku. Ezibisaun sira nee fo enfaze ba responsabilidade ambiental liu husi utilizasaun material organiku, tradisional no resiklajen. Bainhira hakbesik ba selebrasaun sagradu Natal nian, lori ksolok boot hodi halao abertura husi inisiativa espesial ida nee, neebe sei liga fali tradisaun sira neebe kaer metin.
“Iha ita nia nasaun nia istoria tomak, kriasaun prezepiu sira sai hanesan espresaun klean ida ba ita nia fiar, kriatividade no espíritu komunitariu. Maski halo ho liman um ka hatudu iha fatin proeminente sira, ezibisaun Prezepiu sira nee sempre halibur ita nia komunidade sira hodi selebra Jesus Kristu nia moris,” dehan PR, Horta.
Xefe Estadu bolu rezidente hotu Munisipiu Dili nian atu hamutuk hodi hamoris fali tradisaun furak ida nee. Ezibisaun Prezepiu nee laos deit konkursu ida nee oportunidade ida atu hametin ligasaun nuudar komunidade, hodi hatutan tradisaun sira ba jerasaun foun, no atu hatudu talentu artístiku no devosaun espiritual husi povu.
Tanba Ezibisaun nee abertura iha loron 12 fulan Dezembru tinan 2024, too loron 6 fulan Janeiru tinan 2025, ho manan nain sira sei anunsia iha loron enseramentu nian. Manan nain sanulu husi kada kategoria sei simu sertifikadu no premiu osan ho montante US$ 2,000 tuun mai too US$ 150, enkuantu partisipante sira neebe la manan sei simu apresiasaun ho montante UD$ 100.
Nunee mos atu komplementa ezibisaun, feira merkadu lokal neebe organiza husi Prezidensia Republika no Ministeriu Komersiu no Industria sei halao husi loron 12 fulan Dezembru too loron 22 fulan Dezembru. Feira nee aprezenta stand hamutuk 130 neebe hatudu industria uma nian, grupu feto sira, no grupu defisiensia sira, neebe oferese artezanatu lokal sira, bebida, no ai-haan. Eventu nee inklui fasilidade sira ba labarik sira nia fasilidade halimar no divertimentu diretu.
Festividade sira sei kulmina iha selebrasaun Natal ho Povu nian iha Palasiu Prezidensial Nicolau Lobato iha loron 22 fulan-Dezembru tinan 2024, iha neebe Prezidensia sei fahe parseiru Natal nian ba membru komunidade hamutuk 5,000, inklui labarik sira, feto faluk, Orfanatu no ema sira ho nesesidade espesial.
Prezepiu sira nee hetan bensaun husi Dom Virgilio Kardeal do Carmo da Silva, SDB no eventu nee marka prezensa mos husi Primeiru Ministru Kay Rala Xanana Gusmão, membru IX Governu Konstitusional, Komandante PNTL, korpu diplomatiku nomos povu neebe halao prezepiu iha palasiu inklui partisipante seluk tan.
(eme)
