DILI, STLTIMORLESTE.com – Prezidente Republika (PR), Jose Ramos Horta apresia ho prosesu dame Aceh nian, neebe nuudar naroman ba rekonsiliasaun global, iha Elestreia dokumentariu.
Prezidente Republika, Jose Ramos Horta iha Tersa (16/12/2025) asiste estreia filme The Last Accord War, Apocalypse, and Peace in Aceh, dokumentariu ida neebe lidera husi Dino Patti Djalal neebe hatuur kona-ba istoria rekonxiliasaun iha provínsia Aceh, Indonezia nian.
Iha ninia diskursu, Prezidente selebra amizade neebe metin entre Timor-Leste no Indonezia, hodi sublina katak dokumentariu nee nuudar rekursu edukativu vital ida. Prezidente elojia reziliensia povu Aceh nian, hodi nota katak maske natureza luta iha Timor Leste no Aceh-Indonezia la hanesan, nasaun rua nee fahe istoria klean kona-ba superasaun konflitu hodi harii futuru ida neebe dinamiku.
odi refleta kona-ba Memorandu Entendimentu Helsinki 2005 nian, Prezidente Ramos Horta fo omenajen ba korajen polítika neebe hatudu hafoin tsunami devastador iha 2004 no espesifikamente apresia lideransa eis Prezidente Susilo Bambang Yudhoyono no Visi Prezidente Jusuf Kalla, hodi afirma katak sira-nia papel fundamental hodi muda foku husi luta armada ba sobrevivensia umana no dame, halo sira merese simu Premiu Nobel da Paz.
Prezidente enfatiza katak prosesu dame iha Aceh serve nuudar testemuna poderoza ba mundu katak estabilidade neebe duradoura harii bazeia ba kompromisu neebe nesesariu no vontade loloos hodi tau uluk dignidade umana duke kria odiu ba malu kona-ba pasadu.
Durante eventu nee, Xefe Estadu hatoo mos ninia kondolensia profunda kona-ba inundasaun no rai-halai foin lalais nee iha Indonezia, hodi reafirma solidariedade Timor.Leste nian ho nasaun vizinu durante tempu susar sira.
Prezidente Ramos Horta temi kona-ba dinamizmu ekonomiku Aceh nian agora nuudar prova husi “dividend dame nian (peace dividend), hodi espresa esperansa katak istoria reziliensia neebe dokumenta iha filme nee sei kontinua inspira rezolusaun konflitu global. Prezidente Ramos Horta remata hodi kongratula ekipa produsaun tanba prezerva ona kapítulu istoria importante nee, neebe serve nuudar lembrete katak dame laos buat ida neebe hamriik mesak deit maibe presiza dedikasaun nafatin.
Jornalista: Emerenciana Pinto
Editora: Carme Ximenes
