DILI, STLTIMORLESTE.com – Prezidente Republika (PR), Jose Ramos Horta hatete, rezolve problema Greater Sunrise la fasil, maibe oras nee daudaun negosiasaun kontinua lao.
Prezidente Republika Jose Ramos Horta hatoo kestaun nee ba jornalista sira bainhira remata halo abertura konferensia Internasional Sidade Amiga Australia ho Timor Leste iha salaun MNEK, Kinta (10/07/2025).
“Hau hatene ke negosiasaun lao nafatin ho Australia, prosesu nee laos fasil, laos Australia la konkorda play playing mai Timor Leste nee laos ona problema maibe negosiasaun kona-ba impostu kona-ba regra oin-oin tanba operasaun nee sei nafatin Timor ho Australia, Timor Leste labele halo mesak unilateral ita mak iha maioria, maioria iha Greater Sunrise Timor Gap mak hanesan investidor boot Greater Sunrise,” dehan PR Horta.
Prezidente Republika hatete, maibe akordu neebe halo nee la fo dalan ba Timor halo desizaun unilateral, tanba nee mak negosiasaun todan no haree rezolve problema fiskal no problema impostu.
“Maibe entretantu prosesu iha rai laran lao daudaun Governu haree loke ona konkorsu ba infraestrutura iha Natarbora neeba tinan ida nee bele iha ona solusaun ruma, hau la hola parte solusaun nee, hau hatete deit hanesan hau nia hanoin, ita nia autoridade sira Ministeriu Petroliu Timor Gap sira servisu makaas fulan sira mai nee tinan 2 mai nee hetan akordu lalais,” katak PR.
Xefe Estadu dehan, iha Indonezia mos agora prontu atu hahu negosiaun Fronteira Maritima, maibe uluk Indonezia lakohi, maibe primeiru rezolve tiha problema terrestre depois hakat ba Fronteira Maritima, maibe agora Indonezia komunika ona prontu hahu negosiaun Fronteira Maritima mos.
Prezidente Republika iha esperansa tinan ida nee Timor Leste ho Australia bele iha ona solusaun ba Greater Sunrise. “Sim tinan ida nee bele iha solusaun, hau fiar,” katak PR Horta.
(eme)
