DILI, STLTIMORLESTE.com – Prezidente Republika (PR), Jose Ramos Horta sai konvidadu de ondra iha resepsaun iha Mesisina, organiza husi administrasaun sidade nian no instituisaun ho tinan 216, selebra Prezidente nuudar símbolu global ba pas.
Prezidente Republika no Laureadu Premiu Nobel Pas nian, Jose Ramos Horta sai nuudar konvidadu onra iha resepsaun prestijiada ida neebe halao iha istoriku Circolo della Borsa, iha Messina. Eventu nee organiza husi administrasaun sidade nian no instituisaun ho tinan 216, selebra Prezidente nuudar símbolu global ba pas, inkluzaun no liberdade.
Resepsaun nee serve nuudar preludiu ba serimonia ofisial neebe Prezidente Ramos Horta sei simu Doutoramentu Honoris Causa iha Siensia Polítika husi universidade lokal.
Tuir komunikadu neebe STL asesu husi media PR Kinta (20/11/2025) hatete, kalan nee marka ho dialogu klean no hetan partisipasaun husi distinta konvidadu sira, inklui Monsignor Marco Sprizzi husi Se Apostolika no Prezidente Circolo della Borsa nian, Alfonso Polto.
Prezidensia hatoo nia agradesimentu ba Prezidente Kamara Munisipal, sidade Messina, no partisipante sira hotu ba akollimentu manas no onradu.
Eventu nee reafirma kompromisu komun ba valor universal direitus umanus no pas nian neebe Prezidente Ramos Horta dedika nia moris tomak hodi defende iha palku mundial.
Jornalista: Emerenciana Pinto
Editor: Xisto Mendonça
