DILI, STLTIMORLESTE.com – Prezidente Republika (PR), Jose Ramos Horta hatete, sarani no povu Timor Leste (TL) lakon boot, tanba lakon aman Sua Santidade Papa Francisco neebe fila ona ba nia fatin rohan laek.
Prezidente Republika, Jose Ramos Horta hatoo lia hirak nee ba jornalista sira liu husi nia mensajen bainhira rona Sua Santidade Papa Francisco nai bolu hikas iha nain nia kadunan Santu, iha loron Segunda (21/04/2025).
“Hau foin simu informasaun katak, Amu Papa Francisco iis kotu iha minutu ruma liu ba, ita katoliku maibe laos katoliku deit, relijiaun hotu-hotu umanidade tomak lakon boot, tanba Papa Francisco Papa ida impkatu klean liu iha istoria mundu,” dehan PR, Horta.
Prezidente Republika hatete, sente triste lakon bibi atan diak ida neebe durante nee la tauk luta ba injustisa no la tauk luta kontra ema neebe kaer poder neebe halo terus povu.
“Papa Francisco, Papa ida hakoak kiak no fraku sira, Papa ida la tauk koalia poder mundial sira neebe buka funu invez buka dame nia koalia mos kontra poder sira neebe la hanoin ba povu kiak no sira neebe hanehan rai fraku sira Papa ida intelektual ida justisa,” katak PR Horta.
Xefe Estadu hatuta, sarani Timor Leste sei lembra nafatin Sua Santidade Papa Francisco bainhira vizita nia povu no sarani Timor Leste iha fulan hira kotuk.
“Ita hotu-hotu lembra Amu Papa nia vizita mai Timor Leste iha fulan hirak liu ba, nia liafuan ikus molok nia atu tama ba aviaun iha Dili fila ba Roma nia hatete ba hau, kaer hau nia liman, nia hatete tau matan didiak ba povu ida nee,” nia hakotu.
Hakmatek rohan laek iha Nai nia kadunan Santu Sua Santidade Papa Francisco, keta haluha sai reza nain ba povu no sarani Timor Leste, Adeus Aman doben.
(eme)
