DILI, STLTIMORLESTE.com – Prezidente Republika (PR), Jose Ramos Horta hatete, bainhira Governu liu husi Sekretariu Estadu Assuntu Toponimia no Organizasaun Urbana (SEATOU) hakarak halao eviksaun ba komunidade neebe hela iha rai privadu tenke fo kompensasaun.
Prezidente Republika Jose Ramos Horta hatoo kestaun nee ba jornalista sira, bainhira remata partisipa konferensia akademika reflesaun nasional sobre 50 anos Proklamasaun Indepedensia Timor Leste, iha Salaun UNTL, Kaikoli, Kuarta (09/04/2025).
“Se rai privadu tenke iha kompensasaun, kompensasaun neebe justu, liu-liu ema sira be kiak nee, ema sira kiak nee fo kompensasaun diak oituan para hadia sira nia vida,” katak PR, Horta.
Prezidente Republika hatete, bainhira Governu liu husi SEATOU halo eviksaun ba komunidade neebe hela iha rai privadu, Governu tenke selu Kompensasaun.
Aleinde nee komunidade balu mos okupa rai estadu hodi hela,.maibe ikus Governu halo evikasaun hakarak husu kompensasaun ida nee mak ladun diak.
“Rai Estadu balu okupa tiha agora husu ami mos hakarak kompensasaun, hoe apa uluk hatene rai nee Estadu ba okupa tiha hela gratis loos kontente loos tinan 30 nia laran, agora hakarak kompensasaun. Ita bele fo kompensasaun ba Estadu tanba hela tinan 20 la selu buat ida, mas privadu duni tenke selu, liu-liu tanba Timoroan osan ladun barak diak liu haree kompensasaun didiak para ajuda sira,” katak PR, Horta.
(eme)
