DILI, STLTIMORLESTE.com – Prezidente Republika (PR), Jose Ramos Horta sei konsulta ho igreja, sosiedade sivil antes fo indultu ba dadur sira.
Prezidente Republika, Jose Ramos Horta hatoo kestaun nee bainhira remata Vizita Trabalhu ba nasaun Bulgaria ho Reinu Unidu fila hikas mai Timor Leste, iha Aeroportu Internasional Nicolau Lobato, Komoro Segunda (28/04/2025).
“Hau seidauk haree lista difinitiva, orsida hau haree, purtantu indultu nee so ba loron 20 Maiu nee purtantu laos urjente liu, purtantu hau sei haree, nee konsulta ho sosiedade sivil, lista mai ona husi governu, hau sei konsulta ho igreja, sosiedade sivil, depois mak halo desizaun antes 20 Maiu, mas indultu nee relasionadu ho 20 Maiu,” dehan PR, Horta.
Prezidente Republika (PR), Jose Ramos Horta hatete, nia simu ona lista dadur hamutuk nain 30 resin, husi Ministeriu Justisa atu fo indultu iha serimonia restaurasaun independensia ba dala 23, iha loron 20 fulan Maiu tinan nee.
Horta haktuir, sei konsulta ho Primeiru Ministru atu haree lista dadur sira molok dezide fo indultu, maibe Xefe Estadu prefere fo indultu ba dadur sira neebe mak idade avansadu ona no mos kondisaun moras.
“Lubuk ida, hau hanoin lista nee 30 resin tan, indultu nee sempre, normal, hau sei halo dezisaun, maibe rekomendasaun neebe mai husi Governu para halo indultu, hau sei haree didiak tanba rekomendasaun mai husi Ministru Justisa, mai husi Governu, mai husi sistema prizional, liu-liu ba ema sira neebe maka moras, sira neebe katuas liu ona, idade avansadu hau sei haree ida nee, maibe hau sei haree hamutuk ho Primeiru Ministru”, katak PR, Horta.
Tuir lei numeru 5/2016 loron 25 fulan-Maiu artigu 7 alineia D hatete, Ministru Justisa hatoo deit prosesu pedidu indultu, bele mai husi dadur nia família, defeza ka kestaun moras, maibe Prezidente Republika deit maka iha kompetensia atu fo indultu ka hamenus kastigu, hafoin rona Governu tuir Konstituisaun artigu 85, alineia ida.
Antes nee Ministru Justisa, Sergio da Costa Hornai hatete, Governu halo ona komunikasaun ho servisu prizionais sira, hodi prepara lista, liuliu dadur sira neebe naran tama iha lista indultu.
“Lista ba indultu nee konforme pedidu sira neebe mai husi servisu prizionais. Ita halo ona submisaun ba Prezidente Republika kona-ba indultu ninian”, dehan Ministru Sergio da Costa Hornai.
Nia dehan, sei iha tan buat balu sei haruka tan too 20 Maiu tinan nee. Bainhira iha lista ruma ka pedidu ruma mai husi família, ka mai husi servisu prizionais ninian.
Enkuantu, prosesu indultu no komutasaun ba pena tuir lei numeru 20/2023, estabelese katak, fo indultu ka komutasaun (hakmaan) ba pena sira, hanesan intervensaun polítika no umanitaria husi Prezidente Republika, iha ambitu administrasaun justisa.
Tuir artigu 8 husi lei neebe temi ona, Governu halo ona konsulta kona-ba desizaun hirak-nee, ho objetivu atu hasai opiniaun ida, maski ida-nee laos vinkulativu, hodi respeita Prezidente Republika nia kompetensia eskluziva.
(eme)
