DILI, STLTIMORLESTE.com – Prezidente Republika (PR), Jose Ramos Horta hatete, lei pensaun vitalisia nee mai husi Primeiru Governu Konstitusional, no la justu bainhira membru governu no membru parlamentu servisu tinan 5 deit hetan pensaun vitalisia.
Lia hirak nee Prezidente Republika Jose Ramos Horta imforma ba jornalista sira iha Palasiu Prezidensial Nicolau Lobato Bairo Pite, Segunda nee (29/09/2025).
“Pensaun vitalisia nee mai husi Premeiru Governu Konstitusional iha primeiru parlamentu ita fo pensaun vitalisia ba sira neebe hetan mandatu servisu tinan 5, momentu neeba situasaun difisil tebes, depois kada tinan mai mandatu seluk mai hotu-hotu simu, primeiru governu, segundu governu no terseiru no quartu hotu-hotu simu, nee mak hau haree injustu, hau rasik durante tinan lubuk nia laran sempre hatete fo pensaun vitalisia ba membru governu ka parlamentu ba tinan 5 deit, maibe mestri sira ou funsionariu servisu tinan 30 ka 40 too 50 la hetan pensaun vitalisia,” dehan PR Horta.
Prezidente Republika hatete, halao servisu ba tinan 5 deit maibe hetan pensaun vitalisia no hetan regalia oin-oin, maibe mestri neebe hanorin tinan barak vensimentu kiik nafatin, la hetan pensaun, ida nee la justu.
“Tanba nee opiniaun publika joven sira koalia ba ida nee no laos sira deit, ita hatene politiku balun, lider balun bele haree fila fali ba uluk tinan sira kotuk nee iha media sira koalia makaas no promete halakon, hanesan hau hatete mos, hau rekomenda ba governu sukat didiak lei nee maibe nia implementasaun no ezekusaun tenke halo didiak ho fuan ho respeitu ba dignidade ema sira neebe afeitadu,” katak Horta.
Xefe Estadu hatete, Governu presiza haree didiak, laos deit eis titulares, lider balun tinan 50 ona servisu ba rai ida nee liu husi luta, maibe ikus laiha kompensasaun, maibe bele haree fali liu husi veteranus, bele mos haree liu husi asistensia sosial.
“Ita hotu hetan vensimentu diskonta kada fulan entaun bele haree ida nee no haree mos uma, lei nee bele sai maibe governu haree nia implementasaun los duni tenke haree didiak, bele fo aluga ba afeitadu nee aluga katak bele hela iha nee maibe fulan fulan tenke selu, hau lakohi temi ema nee nia naran maibe elementu ida nia veteranus boot 24 anos servisu ho hau nia hela uma ida iha Farol, maibe fulan fulan Ministeriu Justisa no terras propriedade karega nia 2 mil dolar nia tenke selu, nia la hela iha neeba gratis, hau haree ida nee hau mos hakfodak, hau koalia avo Nana mos hakfodak, Ministeriu Justisa karega fali 2 mil dolar nee mos sala,” katak PR Horta.
Prezidente Republika hatete, presiza haree didiak lider veteranus sira, trata ho didiak liu-liu eis Prezidente, Eis Primeiru Ministru, Eis Prezidente Parlamentu, presiza trata ho diak.
Prezidente dehan, antes nia promulga lei pensaun vitalisia, hasoru Primeiru Ministru dala rua no haree mos ba finansas, haree lei reforma para halo ho justisa.
Jornalista: Emerenciana Pinto
Editor: Xisto Mendonça
