DILI, STLTIMORLESTE.com – Prezidente Republika (PR), Jose Ramos Horta simu delegasaun husi Universidade Normal Xina Sul hodi diskuti kona-ba kooperasaun akademika.
Prezidente Republika, Jose Ramos Horta simu Profesor YANG Zhongmin, Prezidente Universidade Normal Xina Sul, iha Palasiu Prezidensial hodi diskuti kona-ba kooperasaun akademika no parseria internasional sira.
Durante enkontru, Profesor YANG fo sai detalhu kona-ba instituisaun nia akordu foin lalais nee ho Universidade Nasional Tokiu no hatudu interese atu haburas relasaun hanesan ho instituisaun edukasional sira Timor Leste nian.
Bainhira remata hasoru malu, Profesor YANG Zhongmin, Prezidente Universidade Normal Xina Sul, iha Palasiu Prezidensail Nikolao Lobato Tersa (06/05/2025) hatete, haksolok hasoru malu ho Prezidente Republika Jose Ramos Horta hodi deskute hamutuk kona-ba kooperasaun akademika ho parseria internasional inklui ho Timor Leste.
Prezidente Profesor YANG destaka kolaborasaun internasional susesu oin-oin neebe ninian universidade estabelese ona, inklui parseria sira ho Universidade Guadalajara no Universidade London.
Nia mos mensiona memorandu entendimentu ida ho UNTL, sujere oportunidade potensial sira ba interkambiu edukasional entre Xina no Timor Leste.
Delegasaun nee informa ba Prezidente Ramos Horta kona-ba diskusaun luan no konsensu múltiplu neebe hetan ona ho sira nia parseiru internasional sira.
Profesor YANG formalmente konvida Prezidente Republika hodi vizita Universidade Normal Xina Sul nian iha Guangzhou, iha neebe nia sei halo palestra ida ba dosente sira no estudante sira, konvite ida neebe mak tuir informasaun prezidente hanoin hela.
Iha hasoru malu nee Prezidente Republika Jose Ramos Horta kompromisu kontínua atu hametin relasaun internasional Timor Leste nian liu husi diplomasia edukativa.
Dezde simu pose, Prezidente sublina edukasaun hanesan fatuk inan ba dezenvolvimentu nasional no buka estabelese parseria sira ho instituisaun akademika prinsipál sira iha mundu tomak hodi fo benefísiu ba estudante no edukador Timoroan sira.
(eme)
