DILI, STLTIMORLESTE.com – Prezidente Republika (PR), Jose Ramos Horta sujere feto mak asumi kargu Komando Jeral (KomJer) Polisia Nasional Timor Leste (PNTL).
Mandatu Komandante Jeral Polisia Nasional Timor Leste sei remata iha loron 25 fulan Marsu, tanba nee Prezidente Republika sujere nomeia fali feto ida mak asumi fali kargu nuudar KomJer, maibe desizaun hotu husi Governu liu husi Primeiru Ministru.
“Se bele iha tan karik feto ida mak komandante Jeral PNTL nee diak, maibe hau la hatene nee desizaun Primeiru Ministru nia, hau rona iha kandidatu ida ke mane, kandidatu ke diak tebes maibe iha mos kandidatu feto ida mos diak tebes, nee duni se tau karik feto ida diak los,” dehan Prezidente Republika ba jornalista iha Aeroportu Internasional Nicolau Lobato, Komoro Tersa (24/03/2025).
Xefe Estadu hatete, ohin loron mane mak lidera Xefe Estadu FALINTIL Forsa Defeza Timor Leste F-FDTL no sub Xefe Estadu maioria husi mane, tanba nee Xefe Estadu husu feto mak lidera fali Komando Jeral, tanba Feto mos iha kapasidade no mentalidade diak hodi lidera Instituisaun PNTL.
“Tanba Xefe Estadu Maior Jeneral Forsa Armada mane, Sub Xefe Xefe Estado Maior mane, Jeneral sira mane, entaun pelumenus PNTL tau komandante Jeral feto neebe diak haree sira diak.
Iha biban nee Prezidente Republik hatete, nia rekomenda feto mak lidera ou asumi kargu nuudar Komandante Jeral Polisia Nasional Timor Leste. “Sim hau prefere Komandante Jeral PNTL feto,” dehan Prezidente Republika.
Iha tinan kotuk Governu liu husi reuniaun Konselhu Ministru kuarta nee (15/03/2023), Konselhu Ministru aprova rezolusaun Governu nian neebe aprezenta Ministru Interior ba nomeasaun Superintendente-Xefe Henrique da Costa ezerse kargu Komandante Jeral Polisia Nasional Timor Leste (PNTL), ba periode tinan tolu.
Aleinde, Konselhu Ministrus mos aprova projetu Rezolusaun Governu, neebe mos aprezenta husi Ministru Interior hodi nomea Superintendente-Xefe Pedro Belo ezerse kargu Segundu Komandante Jeral PNTL, ba períodu tinan tolu.
No iha loron 15 fulan marsu 2026 Komandante Jeral Polisia Nasional Timor Leste no Segundu komandante Pedro Belo sei remata.
(eme)
