DILI, STLTIMORLESTE.com – Prezidente Republika (PR), Jose Ramos Horta hatete, Timoroan neebe mak halao servisu iha liur hanesan Australia, Korea, Inglaterra, no nasaun seluk tan hola parte harii ekonomia no hametin estadu.
Prezidente Republika Jose Ramos Horta hatoo lia hirak nee liu husi nia diskursu iha loron komemorasaun masakre Santa Kruz no loron Juventude ba dala 33 iha Santa Kruz Balide, Tersa (12/11/2024).
Prezidente Republika hatete, presiza hakruuk ba Timoroan sira neebe mak ho vontade buka moris iha rai liur hodi hetan osan sustenta familia, ida nee bele hametin ekonomia Timor Leste no hametin estadu.
“Hakruuk ba Timoroan sira neebe servisu iha Australia, Korea, Inglaterra, Irlanda no balun agora iha Japaun, Portugal no balun estuda iha liur sira hola parte iha prosesu harii ekonomia, harii estadu no hametin estadu,” katak nia.
Prezidente Republika hatete, Joven Timor Leste emigrante sira neebe dook husi Timor Leste moris fatin. Iha Loron Nasional Juventude ida nee, permite dirije mensajen espesial ida ba foin-sae Timoroan sira hotu neebe ho korajen no determinasaun, buka oportunidade foun ba estudu, servisu no esperiensia iha rai liur. Imi tula iha imi nia aan, laos deit mehi ba moris ida neebe diak liu, maibe mós orgulhu no esperansa husi povu tomak neebe fiar no hetan inspirasaun husi imi nia abilidade no imi nia espíritu reziliensia nian.
“Ba ita boot sira neebe hola parte lha diaspora, Timoroan no kontribui ho kompromisu, sakrifisiu no dedikasaun ba moris diak ita boot sira-nia família nian liu husi remesa finanseira, ami hakarak hatoo ami nia rekonesimentu no agradesimeritu klean liu. Apoiu finanseiru neebé imi haruka, rezultadu husi servisu makaas no kolen, reforsa ekonomia ita nia familia sira nian, apoia ita nia oan sira nia edukasaun, no tulun atu garante seguransa ai-haan komunidade barak nian, sai nuudar ai-riin fundamental ba sustentabilidade ita nia rain nian,” katak PR Horta.
Xefe Estadu hatete, esforsu boot ida nee husi komunidade emigrante sira neebe maioria joven, laos deit hametin fonte sira finansiamentu privadu nian neebe tulun Orsamentu Jeral Estadu, maibe mos kontribui ba progresu nasaun sira neebe simu sira.
PR hatete, iha nasaun balun juventude Timoroan sira hetan elojiu ba sira nia kompromisu, excelencia no integridade, no haree hanesan ezemplu servisu no dedikasaun nian. Impaktu neebe Timoroan sira halo laos deit fo benefisiu imediatu ba família, maibe mos sai nuudar legadu neebe enrikese Timor Leste nia imajen iha palku internasional.
Timoroan iha liur reprezenta jerasaun foun husi eroi timoroan sira neebe, ho servisu no sakrifisiu, kontribui ba konstrusaun Timor Leste ida neebe prosperu, solidariu no ekuitativu. Hodi luta ba moris ida neebe dignu no oportunidade sira neebe diak liu.
Nia hatete Timoroan sira nee kontribui ba dezenvolvimentu sustentavel nasaun nian, hodi mehi kona-ba nasaun ida neebe laiha ema ida hasoru kiak. hamlaha ka malnutrisaun inan no oan.
Timoroan sira nia sakrifisiu halo parte iha forsa moris neebe dudu hakarak ba futuru ida neebe Timor-oan hotu-hotu, liu-liu sira neebe presiza liu no vulneravel liu, iha asesu ba moris ida neebe justu no dignu liu.
(eme)
