DILI, STLTIMORLESTE.com – Prezidente Republika (PR), Jose Ramos Horta hatete, Governu Timor Leste apoiu doasaun ba vitima iha Bali, Indonezia, nee hatudu sentidu umanitaria no hola parte diplomasia.
Xefe Estadu hatoo kestaun nee relasiona ona asaun neebe halao husi Governu liu husi Primeiru Ministru, Kay Rala Xanana Gusmao fo doasaun ba vitima inundasaun iha Bali.
“Nee diak los ita nia vijino Bali, Timoroan hira mak iha neeba, Timoroan rihun ba rihun iha Indonezia, se Governu haree iha posiblidade para ajuda oituan nee diak hola parte premeiru hola parte esperitu umanitaria, segundu hola parte diplomasia, nemak tradisaun ona iha Timor Leste,” dehan PR, Horta ba jornalista sira, iha Museum Kaikoli, Dili, Kinta (18/09/2025).
Nia dehan, uluk kedas ho Premeiru Governu Konstitusional kuandu iha sunami iha Indonezia, Primeiru Ministru, Mari Alkatiri momentu neeba rai nee osan laiha maibe nia deside halo Cek ida US$ 50 Mill dolares ba Indonezia depois populasaun rasik mos rekolha hamutuk US$100 mil.
“Bainhira hau akompanha Maun Xanana ba entrega Prezidente Sosilo Bambang Yudhoyono sira iha Indonezia emosioadu loos, Timor premeiru pais do mundu mak halo donativu nee, iha Nova Yorke Sekretariu Jeral, Kofi Annan koalia sai ida nee iha komferensia imprensa nia hatete Timor premeiru pais iha mundu kontribui ba Indonezia,” katak Horta.
Prezidente Republika hatete, donativu sira nee importante hodi hatudu Timor nia umanidade, tanba nee Prezidente konkorda Primeiru Ministru apoiu ba sidadaun sira iha Bali.
Foin lalais Governu liu husi reuniaun Konselhu Ministru (KM) aprova ona projetu Rezolusaun Governu nian neebe aprezenta husi Primeiru Ministru (PM), Kay Rala Xanana Gusmão, hodi fo apoiu vitima inundasaun iha Bali, Indonezia.
Konselhu Ministru aprova ona projetu Rezolusaun Governu nian neebe aprezenta husi Primeiru Ministru, Kay Rala Xanana Gusmão, neebe autoriza doasaun dolar amerikanu milhaun rua ba provinsia Bali, ho intensaun atu apoia esforsu asistensia umanitaria no rekuperasaun populasaun sira neebe afetadu.
Governu Timor Leste mos hatoo solidariedade ba povu, Governu Republika Indonezia, no autoridade provinsia Bali nian, haree ba efeitu destruidor husi inundasaun neebe akontese iha ilha nee iha loron hirak liu ba. Udan boot nakfilak ba mota no rai halai, hodi rezulta pelumenus ema nain 14 mate, ema barak lakon, no ema atus ba atus mak dezlokadu.
Akontesimentu sira nee mos kauza estragu makaas ba uma, estrada, ponte no infraestrutura sira seluk, no mos estragu ba atividade ekonomika lokal, inklui area sira neebe iha importansia turistika.
Jornalista: Emerenciana Pinto
Editora: Carme Ximenes
