DILI, STLTIMORLESTE.com – Prezidente Republika (PR), Jose Ramos Horta hatete, Timor Leste bele iha nia moeda rasik, nee uza ba nasional, maibe nafatin uza dolar sai rezerva tanba pagamentu Internasional uza osan dolar laos moeda.
Prezidente Republika, Jose Ramos Horta hatoo kestaun nee ba jornalista sira, bainhira remata halo enkontru ho Embaixador Arjentina no Embaixadora Estadu Unidus Amerika, iha Palasiu Prezidensial, Nicolau Lobato, Bairo Pite, Dili, Tersa (18/02/2025).
“Muda moeda seluk iha nivel nasional deit, maibe halo pagamentu internasional uza dolar nafatin, buat ida ita iha ita nia moeda nafatin populasaun internu maibe sosa importasaun mai husi Indonezia, Xina o labele selu ho o nia osan, o selu ho dolar mak internasional barak uza, maibe dala ruma rai balu hanesan Arabia Saudita ho Rusia karik tanba sira nia komersiu makaas los, Rusia sosa buat lubuk ida husi Arabi Saudita no Arábia Saudita sosa sira uza sira nia moeda rasik la uza dolar troka direita relasaun nee kompleksu,” katak PR, Horta.
Aleinde nee PR Horta hatete, aban Prezidente Republika sei simu Embaixador lubuk ida, nain 10 resin, Prezidensia hamutuk MNEK prepara mos simu Prezidente Angola, no prepara mos Timor Leste nia adezaun ASEAN.
Xefe Estadu dehan, Timor Leste bele iha moeda maibe konsidera moeda nasional ida la signifika soe tiha dolar, tanba dolar mak hodi halo pagamentu internasional.
“Hau hanoin bele diak ita konsidera moeda nasional ida, moeda nasional nee la signifika ita soe tiha dolar, dolar sei kontinua hanesan ita nia rezerva tanba atu halo importasaun o tenke selu ho moeda ida kuaze hotu-hotu iha mundu nee hakarak mak selu ho dolar, karik ita faan karik buat ruma iha liur hanesan kafe ho mina hau pesoalmente lakohi selu fali ita ho moeda seluk ruma, favor selu ami ho dolar,” katak nia.
Prezidente Republika hatete, bele iha moeda rasik nee sirkulasaun nasional, tanba dolar diak tebes maibe halo komersiu internu karun liu fali.
Ba fatin neebe deit buat oan ida iha Indonezia, la too mil rupiah iha nee hatete kedas 1 dolar, 1 dolar nee 15 mil rupiah, buat hotu ba koalia ho ama sira iha Taibesi 50 sentavus no 1 dolar, tanba moeda neebe ita adopta se forte demais, o atu halo esportasaun ba o nia produtu o nia esportasaun sai karun, tanba nee mak Governu barak estuda ida nee maibe iha Timor Leste seidauk.
Banku Sentral bele estuda daudaun ona, maibe anivel Konselhu Ministru seidauk no Prezidente rasik mos seidauk estuda ida nee, hatete deit akademikamente posibilidade ida oin, laos desizaun ida atu halo ona. Investidor sira mos kontente Timor Leste uza dolar, ne fasil liu ba sira.
(eme)
