DILI, STLTIMORLESTE.com – Prezidente Republika (PR), Jose Ramos Horta hatete, Timor Leste (TL) halo dezenvolvimentu garante ba Orsamentu Jeral Estadu (OJE), tanba nee Ajensia Internasional foti desizaun atu taka apoiu, ida nee laiha impaktu ba TL.
Prezidente Republika, Jose Ramos Horta hatoo lia hirak nee ba jornalista sira, bainhira remata vizita Estadu ba Abu Dhabi no fila hikas mai Timor Leste iha Aeroportu Internasional Nicolao Lobato, Komoro Kuarta (05/02/2025).
Estadu Unidos Amerika agora daudaun foti ona desizaun atu taka hotu Ajensia Internasional neebe apoiu nasaun hotu, ida nee sei iha impaktu ba Timor Leste ka lae? Hatan ba kestaun nee, Prezidente dehan, nia la preokupa ho ida nee, se hakarak taka Ajensia Internasional sira nee bele taka Timor buka parseria seluk.
“Sira hakarak taka bele taka, sira hatete sira la taka deit relasaun ho Jordania, rai rua ka tolu ezipto Israel, rai seluk laos sira taka, maibe para fulan tolu nia laran halo avaliasaun, hau hanoin ita mos halo avaliasaun para haree parseria balu ita hakarak kontinua ka lae? Dala ruma buka parseria seluk ke ita presiza, ladun preokupa ho ida nee,” katak PR Horta.
Signifika katak ida nee la fo impaktu ba Timor Leste ka oinsa? Hatan ba kestaun nee, Prezidente dehan, ida nee laiha impaktu ho Timor Leste.
“Laiha, tanba ita haree Orsamentu Jeral Estadu 100%, ita nia OJE mak boot ba dezenvolvimentu ho salariu saude, edukasaun no infraestrutura, laos ajuda mai husi liur, ajuda balu neebe mai husi liur barak liu sira gasta ho estudu neebe sira halo nee selu sira nia ema rasik karun tebes, depois oituan liu mak ba dezenvolvimentu rural nee akontese iha mundu tomak impaktu ba Timor laiha,” katak PR Horta.
Prezidente Republika dehan, Estadu Unidus taka Ajensia Internasional neebe mak apoiu ba nasaun sira, ida nee laiha impkatu ba Timor Leste, tanba Timor Leste 100% mai husi Orsamentu Jeral Estadu, no karik impaktu ba NGO balu neebe simu orsamentu husi ajensia sira nee ba sira nia atividade balu koalia kona-ba direitus umanus, elesoens no korupsaun, maibe ba Estadu no Governu laiha impaktu, tanba nee Prezidente Republika laiha preokupasaun.
Prezidente Republika hatutan, bainhira taka ona apoiu, Timor Leste bele buka fali parseiru ho nasaun seluk, maibe Timor Leste ida nee laiha impkatu, tanba Timor uza Orsamentu Jeral Estadu mak halo dezenvolvimentu nasional, tanba nee Prezidente Republika ladun preokupa.
(eme)
