DILI, STLTIMORLESTE.com – Prezidente Republika (PR), Jose Ramos Horta hatete, Tentara Nasional Indonezia (TNI) apoiu makaas Timor Leste (TL) hodi tane reformasia iha Indonezia.
Xefe Estadu dehan, ohin halo omenajen ba Eroi sira, sira hotu-hotu neebe fo sira nian vida ba Soberania.
Nomos Timoroan balu neebe moris hela iha NTT, mai hamutuk ho hakuak ba hotu-hotu, konflitu iha rai nee hahu iha agostu 1975, tanba razaun oin-oin. Razaun ida, radikalizasaun ideolojia, no nee fahe balu kedas, partidu sira fahe malu, depois mai Guerra Cívil, hotu-hotu hatene, ema lubuk ida inosente, mate, ohin TL moris iha rai ida lívre, independente.
Agradese mos laos deit ba Timoroan sira neebe luta, mate ba lideransa nasional, maibe hanesan ema hotu mos hatene, iha momentu neeba, 1997, 1998, Prezidente BJ Habibie, Estadista Boot ida, neebe ho nia vizaun, nia hahu prosesu atu rezolve problema Timor-Leste nian.
“Maibe, para ita moris, hetan susesu, ita moris iha nasaun lívre ida, Tentara Nasional Indonezia (TNI) sira mos kontribui. Tanba sira fo dalan ba BJ Habibie, para halo reformasia iha Indonezia no kontínua rezolusaun problema TL nian. Nee duni ita tenke rekonhese papel importante tebes-tebes TNI, neebe permite prosesu 1999 lao ba oin, maske ho difikuldades hotu-hotu mak ita hatene, no sira mak tane reformasia iha indonezia,” dehan PR, Horta liu husi diskursu iha selebrasaun loron proklamasaun Indepedensia ba dala 49, iha kampu 1 Maiu RAEOA, Kinta (28/11/2024).
Prezidente Republika hatete, Prezidente Habibie nia espiritu nafatin moris iha memoria povu Timor Leste nia neon.
“Prezidente BJ Habibie sei moris nafatin iha ita nia memoria, tanba ho nia, iha tempu neeba, halo negosiasoens ho sekretariu jeral ONU, ho Portugal, hetan akordu Maiu 1999, depois Konsulta Populár, ita fahe malu iha situasaun difísil duni. No sorte ke, rai ida nee iha líder ida hanesan Kay Rala Xanana Gusmão, oras nee Primeiru Ministru dala ida tan, momentu neeba Komandante Supremu Rezistensia, nia mak dada dalan ba rekonsíliasaun Nasional, ho nia matenek, nia inspira, bolu Timoroan tomak atu husik ba kotuk, buat neebe iha kotuk. Pasadu ba pasadu. Ita neebe moris tau matan ba vítima. Vítima sira iha Timor Leste, hanesan vítima mos iha Indonezia,” dehan hatete Xefe Estadu.
Nia dehan, lideransa Xanana nian mak hanesan loke dalan ba maun-alin sira iha Indonezia, sira neebe uluk luta ba autonomia, sira hili desizaun ida atu hela ho Indonezia, maibe simu-malu, hamutuk.
Tanba nee lalika halo julgamentu ba pasadu. Lalika hanoin bebeik ba pasadu, tanba hakarak koalia ba pasadu, koalia kona-ba Agostu 1975, ou koalia kona-ba Masakre Aileu, Same, no krize sira seluk iha nia leet rasik.
(eme)
