DILI, STLTIMORLESTE.com – Prezidente Republika (PR), Jose Ramos Horta hatete, unidade harii husi sakrifisiu komum, nee mak fundasaun solidu ba sustentabilidade estadu no futuru prosperu.
Prezidente Republika, Jose Ramos Horta hatoo kestaun nee liu husi diskursu iha seminariu siklu reflesaun kona-ba aniversariu invazaun ba dala 50 unidade nasional garante sustentabilidade estadu no nasaun. Iha Postu Administrativu Loes, Munisipiu Likisa, Domingu (07/12/2025).
Prezidente Republika hatete, Timor Keste nia unidade harii husi sakrifisiu komum nee mak fundasaun solidu ba futuru prosperu.
Loron 7 Dezembru dedika ba reflesaun klean kona-ba nasaun nia pasadu no futuru. Prezidente Ramos Horta prezide sesaun abertura, hodi sublina legadu duradoura luta nian.
“Ita-nia unidade harii liu husi sakrifísiu komun. Ida nee mak fundasaun solidu ba sustentabilidade ita-nia Estadu no futuru prosperu ita-nia Nasaun,” afirma Prezidente Ramos Horta.
Nunee mos Padre Sebastião Eugenio da Cruz Correia hatutan, hahalok neebe uluk heroi sira husik hela liu husi sira nia luta ida nee hahalok neebe husik hela hodi hatene ba oin, hanesan mos tema ba loron 7 fulan dezembru mak Unidade mak garantia ba sustentablidade nasaun ida nee nia.
“Los duni unidade mak halo ita garante ukun rasik aan laiha unidade ukun rasik aan lamai, kuandu haree ba passado ita mos hakarak moris iha futuru ida neebe laiha tan pasadu ida uluk nia, passado hanorin ita atu luta ba futuru ida neebe diak ba sustentablidade nasaun ida nee nia,” dehan Padre Sebastião.
Padre nee dehan, João Batista mos konvida ema hotu atu hakribi hahalok uluk la unidade, nia hodi fila fali ba diak atu halo diak ba rai ida nee ba povu ida nee.
“Hakribi buat sira neebe odi malu nia vigansa ita tenke hakribi pasadu neebe ladiak ita tenke hakoi hamutuk tanba oras nee ita tama ona tinan 50 invazaun nia, ita tenke brani husik, idade karik it abele dehan invazaun nee idade katuas tiha ona, ita tenke haluha ona idade sira uluk kiik nia, tenke hanoin ba oin hodi hamoris hikas unidade hakribi buat neebe lahalo ita unidade tanba nee ita tenke hakribi hodi hakiak hikas unidade ida neebe atu lori nasaun ida nee ba oin ba progresu dezenvolvimentu ba futuru ida neebe nabilan,” dehan nia.
Nia dehan, hanesan Joao Batista hakilar hakribi aan ba hodi fila ba dalan diak basa reinu lalehan besik too ona, uluk luta nain sira hakribi sira nia hahalok ida ladiak la unidade nia harii hikas unidade hodi harii fali povu foun ida hodi luta ba ukun rasik aan ikus mai harii duni nasaun nee.
Nasaun nee laharii ho individualismu maibe harii ho unidade, unidade ida neebe hanaran unidade iha domin, domin ba rai domin ba maun alin sira domin ba povu mak ikus mai hetan liberdade.
“Laiha unidade mak laiha progresu laiha dezenvolvimentu sei laiha sustentablidade ida diak ba nasaun ida nee, se ita idak idak kaer deit ba ita idak idak nia hakarak rasik diak rasik susar tebes atu povu no rai ida nee bele sai diak, loos duni ita iha partidu idak idak ketak ketak ideologi lahanesan maibe hanoin ida deit katak povu ida nee rai ida nee sai diak iha futuru ba jerasaun sira mai atu sir abele temi netik ita iha loron aban bainrua nia,” katak Padre nee.
Padre nee husu ema hotu nafatin hakribi hahalok neebe lahalo ema unidade, nunee hamutuk fo liman ba malu lori rai nee ba oin ho diak, maske lider sira iha partidu ketak ketak ideologi lahanesan maibe presiza hametin unidade nunee lori rai no povu nee ba oin ho diak.
Jornalista: Emerenciana Pinto
Editora: Carme Ximenes
