DILI, STLTIMORLESTE.com – Prezidente Republika (PR), Jose Ramos Horta hatete, nia viajen ba nasaun Bulgaria ho Reinu Unidu vizita trabalhu, laos ofisial.
Prezidente Republika, Jose Ramos Horta hatoo kestaun nee bainhira remata Vizita Trabalhu ba nasaun Bulgaria ho Reinu Unidu fila hikas mai Timor Leste, iha Aeroportu Internasional Nicolau Lobato, Komoro Segunda (28/04/2025).
“Hau ba vizita trabalhu laos vizita ofisial maibe vizita trabalhu ba Bulgaria nee Primeiru vez mak ba enkontru ho Prezidente Republika, iha neeba situasaun politika ruma mudansa iha neeba, koalia buat balun neebe hau haree bele iha karik utilidade ba Timor Leste, nee sei liu husi Ministeriu Saude, tanba Bulgaria iha area medisina diak tebes indutria Farmasia diak tebes ekipamentu mediku diak, hau husu se bele sira simu doutor balun husi Timor Leste, se doutor nee formadu ona ba iha neeba fulan 3, fulan 6 tinan 1 para haree funsionamentu servisu doutor sira iha neeba para manan esperensia liu tan,” katak PR, Horta.
PR Horta hatete, iha Bulgaria koalia mos asuntu lubuk ida maibe nee asuntu informal, depois remata liu ba Inglaterra nee konvite husi instituisaun akademika rua, nee hanesan vizita privadu maibe Prezidente Parlamentu Reinu Unidu hakarak hasoru Prezidente entaun lider nain rua halo enkontru, aleinde hasoru mos Ministru Negosiu Estranjeiru Inglaterra ho funsionariu lubuk ida sira mantein desizaun loke embaixada iha TL tuir sira nia kalendariu iha tinan ida nee.
Aleinde nee koalia mos kona-ba Timor nia Adezaun ba ASEAN sira apoiu hamutuk ho Singapura iha kapasitasaun ita nia prosesu lao daudaun, aleinde nee hasoru mos Timoroan lubuk ida.
Prezidente Republika hatete, nia mos partisipa prosesu funebre Sua santidade Papa Francisco iha Roma.
Prezidente dehan, Sua Santidade Papa Francisco nia apoiu no admirasaun iha mundu tomak husi ema relijiaun oin-oin, hotu-hotu, lubuk ida, inklui mos Prezidente lubuk mos partisipa prosesu Funebre.
Aleinde nee durante iha Reinu Unidu Prezidente Republika, Jose Ramos Horta hasoru malu ho reprezentante sira husi komunidade Timoroan neebe hela iha Reinu Unidu durante enkontru badak ida maibe signifikativu, iha Eton College iha Windsor, Berkshire.
Enkontru nee halibur maizumenus membru 50 husi diaspora timoroan, inklui Prezidente nia subrinu no beioan, hodi destaka ligasaun pesoal sira neebe mantein.
Durante interkambiu kordial nee, Prezidente Ramos Horta hatoo nia apresiasaun ba diaspora timoroan nia kontribuisaun signifikativa ba Timor Leste nia reputasaun internasional. Xefe Estadu enkoraja ema sira neebe marka prezensa atu envolve nafatin iha esforsu dezenvolvimentu nasaun nian enkuantu hametin lasu identidade, kultura, no solidariedade entre Timoroan sira iha rai liur no sira nia rai.
Enkontru ida nee reflete importansia kontínua neebe Timor Leste nia lideransa tau hodi mantein ligasaun ho nia komunidade diaspora global nuudar parte ida husi nasaun nia estratejia envolvimentu Internasional neebe diak liu.
(eme)
