DILI, STLTIMORLESTE.com – Prezidente Republika (PR), Jose Ramos Horta hatete, violasaun iha nasaun Mianmar grave no ekipa jurista mai hatoo ona keixa iha Timor Leste (TL).
Prezidente Republika Jose Ramos Horta hatoo kestaun nee ba jornalista sira iha Portu Dili, Sesta (16/01/2026) hatete, foin lalais mos ekipa jurista husi Mianmar mai hasoru Prezidente koalia kona-ba violasaun direitus humanus neebe akontese iha neeba, maibe antes hasoru ekipa hatoo ona keixa iha Tribunal TL hodi husu Timor nia apoiu.
“Sira ema jurista hola parte programa ida konaba justisa, sira mai koalia ho hau husu Timor Leste nia apoiu, maibe sira aprezenta tiha ona keixa iha ita nia Prokurador Jeral Republika kontra rejime Mianmar, tanba sa mak aprezenta iha nee, tanba tuir direitu internasional, direitus humanus kualker estadu demokratiku bele simu keixa kontra rai seluk neebe viola direitus humanus,” dehan PR Horta.
Prosesu nee bele too tribunal bele husi Prokurador Jeral Republika ba Tribunal Dili ba Tribunal Rekursu bele ba too iha neeba, no Tribunal Rekursu bele halo pronunsiamentu maibe pronunsiamentu deit labele halo buat ruma.
Oinsa ho pozisaun Prezidente Republika ba situasaun Mianmar oinsa? Hatan ba kestaun nee Prezidente Republika hatete, situasaun iha Mianmar nee grave tebes no violasaun Direitus Humanus grave.
“Situasaun grave tebes violasaun direitus humanus grave, funu nafatin la para, sira la rona lider ASEAN sira, Prezidensia ASEAN hahu ho Indonezia kuandu sira invade ka halo golpe primeiru, depois liu ba rai sira seluk ba Kambodia, Laos, depois Malazia, Filipina, too agora la hetan solusaun, tanba lider militar sira la rona lider sira ASEAN rasik,” katak PR Horta.
Prezidente Republika Jose Ramos Horta hatete, Timor Leste laiha violensia politika, violensia politika iha Timor zero media free los, demokrasia Timor nia makaas, ema hakilar deit iha parlamentu husi media deit maibe laiha partidu politiko ruma ke halo violensia.
PR dehan, TL laiha violensia politika, laiha violensia no diskriminasaun rasial etnika ou relijiozu, tanba nee orgulhu nuudar Prezidente.
(eme)
