DILI, STLTIMORLESTE.com – Prezidente Republika (PR), Jose Ramos Horta halao enkontru ho Embaixadora Republika Popular Xina nian, Wang Wenli, hodi diskute kona-ba kooperasaun bilateral entre Timor Leste ho Xina.
Prezidente Republika, Jose Ramos Horta ohin simu Embaixadora Republika Popular Xina nian, Wang Wenli, iha Palasiu Prezidensial, hodi rona esplikasaun abranjente kona-ba progresu kooperasaun bilateral. Enkontru nee nuudar kontinuidade husi vizita estadu Prezidente nian ba Xina iha tinan kotuk, iha neebe asina akordu xave hamutuk 14 hodi eleva relasaun ba parseria estratejika ida neebe abranjente.
Prezidente Republika, Jose Ramos Horta halo revizaun ba implementasaun akordu sira nee, hodi reafirma ninia kompromisu atu garante katak parseria internasional sira fo benefísiu konkretu no tanjível ba povu Timor Leste.
Embaixadora Wang hatudu progresu sira neebe rejista, inklui lansamentu voo komersial diretu entre Timor-Leste no Xina, neebe Prezidente konsidera hanesan passos importante atu dinamiza relasaun ekonomiku, turístiku no interpessoal.
Xefe Estadu mos saudadu oportunidade bolsa estudu neebe aumenta ba juventude timoroan sira iha area estratejika hanesan agrikultura, medisina no direitu, hodi sublina katak inisiativa ida nee kontribui diretamente ba fortalesimentu kapasitade husi kapital umanu nasional.
Parte signifikativu ida husi diskusaun nee dedika ba projetu reabilitasaun area tasi-ibun Díli nian. Prezidente hetan atualizasaun kona-ba progresu husi inisiativa neebe hetan fundus husi Xina, neebe sei dezenvolve fali espasu publiku husi Farol too iha Avenida Portugal. Projetu nee, neebe sei inklui konstrusaun jardín publiku ida no kampu futebol ida, hetan apresiasaun husi Prezidente Ramos Horta, neebe destaka ninia importansia atu hadia kualidade moris ba rezidente sira iha Díli no hafurak liutan paisajen sidade kapital nian.
Bainhira remata hasoru malu Embaixadora Republika Popular Xina nian, Wang Wenli, ba jornalista iha Palasiu hatete, sente kontente hasoru Prezidente hodi koalia vizita Prezidente antes ba Xina liga ho akordu sira neebe halo ona hodi promove liu tan.
“Hau apresia tebes ba Prezidente Republika hasoru malu no hau relata ona rezultadu neebe durante Prezidente Republika nia vizita ba Xina neebe atinji ona, ami promove ona ida nee diak tebes,” dehan nia.
(eme)
