MALAZIA, STLTIMORLESTE.com – Prezidente Republika (PR), José Ramos Horta admira ho figura Kay Rala Xanana Gusmão, neebe konsege lori Timor oan husi matebian tama too ASEAN iha 2025.
Xefe Estadu hatete, iha serimonia ofisial kona-ba adezaun Timor Leste (TL) nian ba ASEAN nee emosional tebes ba povu Timor Leste.
Horta dehan, nia sente emosional tebes iha serimonia ofisial nee Timoroan barak inklui Primeiru Ministru, Kay Rala Xanana Gusmão tanis, tanba sente orgulhu ho TL ninia adezaun ba ASEAN ba dala-11.
“Hau haree ba maun Xanana nia tanis, hau simpatia los ho nia tanba sa, hau hanoin ba kotuk nee povu nian oan nee (Xanana) mak dada ita husi dezastre matebian, no problema oin-oin too ita tama ASEAN,” hatete PR, José Ramos Horta liu husi Konferensia Impprensa neebe halao iha otel W, Kuala Lumpur, Malazia, Tersa (28/10/2025).
Horta afirma, Primeiru Ministru Xanana tanis iha serimonia ofisial nee, tanba esforsu hotu-hotu neebe nia halo hodi lori TL adere ba ASEAN.
Maibe labele haluha lider nasional sira inklui saudozu seluk neebe hahu husi saudozu Francisco Xavier do Amaral, Saudozu Nicolao Lobato no lider komandante sira seluk neebe oras nee la hamutuk ona ho povu TL.
“Labele haluha mos papel FRETILIN nian, Doutor Mari Alkatiri, Taur Matan Ruak, Francisco Guterres “Lu Olo” inklui lider nasional sira seluk, inklui papel igreja nian neebe kontribui makaas tebes ba prosesu luta ba ukun rasik aan,” dehan nia.
Nia reforsa liu tan katak, Timoroan sira bele selebra adezaun Timor Leste nuudar membru ASEAN ba dala-11, maibe liu tiha ida nee tenke servisu makaas liu tan, tanba sai ona membru permanente nee sei hasoru servisu todan barak.
“Hau hanoin Timoroan barak hodi kalan selebra adezaun Timor Leste nian, balun hemu tua lubuk ida lanu too ulun moras maibe o nia lanu nee liu tiha ona no hahu ohin nee sei servisu todan liu tan,” dehan PR, Horta.
Jornalista: Alberto Menezes
Editora: Came Ximenes
