DILI, STLTIMORLESTE.com – Xefe Departamentu Maternidade iha Hospitál Nasionál Guido Valadares (HNGV), Zinia Mascarinhas hatete, husi loron 17 too 23 fulan Abril tinan 2025, bebe neebe moris iha HNGV hamutuk nain 84.
“Durante loron paskua nia laran, total inan partus 84, ita laiha inan neebe mate iha loron neeba, husi bebe neebe moris 84, husi numeru iha feto nain 36 no man 48, ita haree barak mak partus normal,” hatete Zinia Mascarinhas ba jornalista sira iha sala Maternidade HNGV Bidau, Dili, Kinta (24/04/2025).
Nia esplika, husi inan neebe partu normal nee iha 52 no sejarania 13 nomos fakum 17 nomos bebe mate iha kabun laran nain rua no la rejistu inan mate.
“Bebé neebe mate iha kabun laran nee fulan seidauk too, ida fali rujukan husi Munisípiu mai, depois bee manas fakar ona antes no bebe han fo’er ona no halo bebe mate iha kabun laran, ita labele salva ona, no ita observa inan partus normál deit,” nia deklara.
Tanba nee husu ba inan isin rua sira tenke konsulta beibeik ba Sentru Saude sira, atu hatene kondisaun bebe iha kabun laran too partus.
Iha fatin hanesan, Inan Julia Ximenes husi Munisípiu Baukau informa, nia rujuk husi Ospital Referal Baukau tanba bebe loron liu ona mais seidauk partus, maibe too iha HNGV foin kalan ida bebe moris ona.
“Hau oan primeiru, hau baixa loron rua ona iha Ospital Baukau maibe la diak sira haruka hau mai HNGV, no mai kalan nee kedas hau nia bebe moris, maibe partus fakum, hau agradese tanba bebe saude diak no hau mos hanesan, atendimentu iha diak tebes,” nia afirma.
(jen)
