DILI, STLTIMORLESTE.com – Eskola Sekundariu Jeral nu. 4 Setembru Balide husu Ministeriu Edukasaun (ME) atu solusiona sala aprendizajen ualu (8) neebe sai risku ba inundasaun iha tempu udan.
Lia hirak nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba jornalista STL iha nia knaar fatin Balide, Tersa nee (22/04/2025).
“Inundasaun nee eskola sempre hetan problema mak sala turma ualu nee bele dehan, bee nalihun iha turma laran, kona-ba asuntu ida nee hau hatoo ona ba iha Sekretariu Estadu ME nian, hau hatete problema neebe mak mosu, tinan-tinan ita labele haree hela deit nunee, maibe pelumenus ita tenke buka solusaun atu rezolve, nee duni tuir informasaun Eskola nu. 4 Setembru atu hadia sai hanesan pilotu ba eskola seluk,” nia dehan.
Nia dehan, inundasaun nee bee husi estrada mak mai iha areador eskola, agora valeta sira nee nakonu tiha hotu, tanba nee bee husi estrada hakarak ka lakohi tama mai fali eskola, ho ida nee mak sala 8 nee afeita ba inundasaun iha tempu udan.
Nunee mos Estudante ESJ nu. 4 Setembru, Julia de Jesus Maia hatete, bainhira udan, sala parte andar ninia nee bee nalihun too sala inklui varanda, tanba dala ruma bee husi estrada boot nee mak tama fali mai eskola.
Iha fatin seluk, Diretor ESJ FINANTIL, Aniceto Berlelo dehan, areador Eskola FINANTIL nee espasu kiik, maibe bainhira udan bee nalihun iha areador eskola nian, eskola ida nee komunidade la hela iha laran, tanba espasu eskola deit kiik nunee.
“Hau hanoin areador Eskola FINANTIL nee espasu kiik, maibe bainhira udan bee nalihun iha areador eskola nian, eskola ida nee komunidade la hela iha laran, tanba espasu eskola deit Kiik nunee,” nia afirma.
(jac)
