DILI, STLTIMORLESTE.com – Publiku balun husu atu reativa fali aviaun Zona Espesial Ekonomia Sosial Merkadu (ZEESM), ho ida nee Primeiru Ministru Kay Rala Xanana Gusmão husu Oecusse oan kalma, tanba daudaun nee halo hela investigasaun aviaun nee se nian los.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato Bairru Pite, Kinta (19/02/2026).
Primeiru Ministru husu ba Oekusi oan no publiku kalma hodi hein prosesu investigasaun kona-ba aviaun Zona Espesial Ekonomia Sosial Merkadu (ZEESM), tanba nee Governu seidauk deside atu reativa hikas sei paradu hela.
“Ita tau iha neeba husu ba publiku Oekusi oan kalma, tanba ita la hatene aviaun nee se nian mos ita la hatene. Neebe iha hela prosesu investigasaun,” informa PM Xanana.
PM Xanana mos preokupa, durante nee aviaun ZEESM halo operasaun iha rai laran deit, Dili, Oekusi no Suai ho pasajeiru oituan deit, maibe estadu gasta osan boot ba aviaun nee rasik.
“Ita husu publiku Oekusi sira iha ona ideia kona-ba osan neebe ita gasta ba buat ida ba, mai, lori ema nain hira oan deit, gasta osan barak atu mate nee mak ita halo hela investigasaun,” hatete nian.
Eis Kordeador Zona Ekonomika Espesial Desenvolvimentu Ambenu (ZEEDOA), João Gonçalves sujere ba IX Governu Konstitusional neebe lidera husi Primeiru Ministru Kay Rala Xanana Gusmão atu reativa hikas aviaun Zona Espesial Ekonomia Sosial Merkadu ( ZEESM), hodi halo konetividade fila fali ba iha Oekusi.
João Gonçalves konsidera Oekusi em klave. Maibe sira infrenta difikuldade balun, liu-liu iha area konetividade, tanba uluk Aero Dili halo ligasaun Oekusi semana ida dala rua, no sira husu para aumenta ba semana ida dala tolu, maibe akontese tun fali ba loron ida deit. Entaun ida nee la sufisiente no kria difikuldade barak ba ema sira, liu-liu investores vizitante neebe hakarak ba Oekusi.
Tuir nia haree nee, konetividade importante tebes-tebes ba Oekusi, sira iha aviaun Zona Espesial Ekonomia Sosial Merkadu ( ZEESM), maibe too agora paradu hela, entaun la bele kontribui reseita ba estudu.
“Hau hanoin aktual governu rejional nee tenke haree ona posibilidade oinsa para reativa fali aviasaun ZEESM nee Atu nunee bele halo konetividade fila fali ba iha Oekuse,” João Gonçalves informa, hafoin Partesipa selebra loron China iha edifisiu China Maromak, Tersa (17/02).
Nia rekonhese katak, atu halo manutensaun jeral ba aviaun ZEESM nee sei gasta osan lubuk ida ba halo. Tanba aviaun ZEESM nee paradu kleur tiha ona. Maibe presiza halo manutensaun, Nunee bele reativa hikas fali.
(eme)
