DILI, STLTIMORLESTE.com – Ministeriu Ensinu Superior Siensia no Kultura (MESSK) apela ba universidade no institutu sira kontinua halo kooperasaun neebe diak ho Governu liu husi MESSK.
“Ita nian lei baze de ensinu superior nee Parlamentu Nasional aprova tiha ona no Prezidente Republika promulga ona, tanba iha artigu 13 Konstituisaun RDTL mos hatete klaru, lian introdusaun hanorin iha universidade mak rua nee, tetum ho português, agora ita la taka, la bandu universidade sira, karik sira husu hanorin ho inglês, kontinua hanorin ho inglês, tanba inglês mos mais imporrtante mai ita, tanba iha relasaun internasional sira, neebe hau hanoin sira haree ona no hatene,” afirma Ministru Ensinu Superior Siensia no Kultura (MESSK), Jose Honorio Jeronimo da Costa Pereira ba jornalista sira iha salaun Delta Nova, Komoro, Tersa nee (18/03/2025).
MESSK mos apela tan dala ida ba universidade sira, tanba magnifiku reitor sira iha reuniaun konselhu reitores, husu ba sira kontinua kooperasaun ho MESSK, para neneik-neneik hatudu kualifikasaun akademiku ba oin.
Nunee mos Mateus Maia de Jesus hanesan Reitor EAST Timor Coffee Institute (ETCI) dehan, lei baze ensinu superior neebe aprova ona no instituisaun ensinu superior sira iha TL iha kooperasaun neebe diak ho MESSK, liu-liu liga ba kooperasaun servisu ba area edukasaun.
Entretantu Reitor ISC, Sebastião Perreia hatete, universidade no institutu sira nafatin iha kooperasaun neebe mak diak ho Governu liu husi Ministeriu Ensinu Superior, bainhira iha asuntu ruma no rekomendasaun ruma sempre fo informasaun ba malu, tanba kooperasaun nee importante tebes entre universidade no institutu sira nee, tanba ho lei baze de ensinu superior nee importante.
(jac)
