DILI, STLTIMORLESTE.com – Institutu Apoiu Dezenvolvimentu Emprezarial (IADE) lansa kompetisaun planu negosiu inovativu ba tinan 2025, ho tema “Inovasaun Mak Dalan ba Susesu”.
“Ohin IADE halo lansamentu ba kompetisaun planu negosiu inovativu ba tinan 2025, ho tema “Inovasaun Mak Dalan ba Susesu”, programa nee foka ba ita nia joven Timoroan feto no mane neebe iha hanoin hakarak atu sai emprezariu nomos iha boa vontade hakarak dezenvolve sira nia aan no sai emprezariu,” hatete Diretor Ezekutivu IADE, Filomeno Marcelino Belo ba jornalista sira iha Salaun Provilao II CCD, Tersa nee (25/02/2025).
Nia dehan, liu husi kria hanoin idea inovativu bele halai ba setor industria agrikultura, peskas no turizmu no seluk tan, para sira bele dezenvolve sai emprezariu.
Benefisiu saida hetan husi ami, sira hetan konhesimentu klean ligadu ho vida emprezarial atraves seminariu nasional IADE fasilita ba sira inklui formasaun emprezarial ba sira iha faze darua, primeiru identifika sira nia ideia negosiu hotu, kontinua ba iha formasaun kapsitasaun emprezarial liga ba halo planu ba ideia inovasaun, nunee ideia inovasaun halo ona planu aprezentasaun planu ba juri iha kada munisipiu sira, depois hetan diak iha munisipiu, sira sei reprezenta munisipiu mai iha nivel nasional.
Nunee iha nivel nasional sei halo preparasaun ba sira hetan the best, liu husi total partisipantes neebe rejistu, sira sei iha Dili aprezenta ba Juri nivel nasional, ikus mai determina se mak sai vensedor ba kompeitisaun nee.
Nia relata, depois manan nain sira, primeiru IADE sei apoiu kapital atu hahu sira nia negosiu neebe inovasaun nee, segundu akompanha, fasilita fo apoiu tekniku asistensia ba sira durante tinan rua, para sira bele lao diak liu, terseiru IADE apoiu sira dalan ida naran liga sira ho sira nia sosa nain, sira produs sasan IADE promove liu husi halo komersializasaun ba sira no halo marketing ba nia bisnis liga hela ba sira nia sosa nain neebe durante liga ho produtu neebe produs.
Prosesu nee mak durante nee IADE sei halo durante fulan hitu depois remata, se mak sai manan nain. Kompetisaun nebe halo nee nivel nasional hatudu katak munisipiu hotu-hotu komesa ohin ba oin loke ona ba territoriu tomak, bele dehan 11 Munisipiu inklui Dili, ita rejista ba sira durante fulan ida depois halo prosesu tuir mai. Total apoiu orsamentu ba manan nain pur volta rihun US$ 25 ital husi osan US$ 25 ital fahe ba sub tema.
(joa)
