DILI, STLTIMORLESTE.com – Instituto Ciência Saude (ICS) simu ona karta husi Ministeriu Ensinu Superior Siensia no Kultura (MESSK), no ICS sei submete proposta subvensaun públika ba ministeriu.
Lia hirak nee hatoo husi Reitor ICS, Leao Borges ba jornalista STL iha nia knaar fatin, Kinta nee (12/03/2026).
“Kona-ba subvensaun ba tinan ida nee, ami simu ona karta husi MESSK, agora ami prepara hela ami nian proposta atu hatama, montante subvensaun ba tinan ida nee hamutuk 49.624. Ami simu ona karta husi MESSK, nee duni agora daudaun ami prepara hela ami nian proposta submete ba ministériu,” nia informa.
Tuir Reitor ICS nee katak, agora daudaun ICS prepara hela proposta subvensaun nian hodi bele submete ba ministériu, tanba data ikus hatama proposta nee bainrua, nee hanesan baibain sei fo apoiu ba ekipamentus mediku nian, laboratoriu ninia nomos fo apoiu ba dosentes no estudantes sira.
“Sei fo apoiu ba atividades lingua português ninia, nee ba estudantes no dosentes sira hotu, depois ami sei haree balun ba iha peskiza ninia, tanba nee daudaun nee prepara hela ami nian proposta para atu bele submete ba iha MESSK,” nia esplika.
Nia afirma, subvensaun tinan kotuk ninia nee simu primeiru 50%, no simu segundu ninia mos hanesan 50%, maibe ba tinan ida nee nian sira foin simu karta husi Ministériu Ensinu Superior.
Iha fatin seluk, Reitor East Timor Coffee Institute ( ETCI), Mateus Maia de Jesus antes nee dehan, iha tinan 2025 East Timor Coffee Institute ( ETCI) la hetan subvensaun públiku, tanba hetan transformasaun.
“Hau hanoin kona-ba subvensaun, ami nian relatóriu hatama iha loron 15 Janeiru tinan 2025, maibe ida nee subvensaun neebe mak ami hetan husi MESSK iha tinan 2024 ninia, nee ami hatama ratoriu tuir kalendariu ministeriu nian. Ami iha 2025 la hetan subvensaun públika husi MESSK, tanba hetan transformasaun, tanba nee ba tinan 2025 ami la hetan subvensaun,” nia dehan.
(jac)
