DILI, STLTIMORLESTE.com – Tinan nee, Ministeriu Edukasaun (ME) identifika diploma falsu haat (4) husi ema neebe ba legaliza diploma nivel sekundariu no kazu nee submete ona ba parte inspesaun jeral hodi bele halo prosesu.
“Tinan ida nee ami identifika diploma falsu haat, nee ami submete ona ba iha parte inspesaun jeral mak sei halo prosesu ba asuntu kona-ba diploma falsu neebe mak ami nian diresaun identifika, bainhira sira lori mai atu legaliza, nee ami identifika iha fulan Janeiru tinan ida nee nian laran, tanba agora nee iha Ermera rua, maibe diploma falsu nee foin mak Dili deit,” tuir Diretor Nasional Ensinu Sekundariu iha ME, Benjamin Gomes da Cruz Fernandes ba STL iha ESJ FINANTIL Aimutin, Segunda nee (23/02/2026).
Tuir nia, ME identifika diploma falsu husi ema neebe ba legaliza sira nian diploma nee, tanba bainhira sira ba legaliza sempre husu diploma orijinal, maibe mosu ba laos orijinal, maibe diploma falsu, tanba nee mak diploma hotu-hotu neebe mak ba halo legaliza nee tenke lori orijinal.
“Tanba nee mak ami sempre husu ba ema neebe ba legaliza diploma nee tenke hatudu diploma orijinal, bainhira la hatudu orijinal nee ami sei la simu. Nee duni diploma falsu haat neebe ami identifika, ninia prosesu agora iha inspesaun jeral nian liman, nee sira mak sei prosesa, bainhira ami hetan kazu hanesan nee ami entrega ba iha parte inspesaun jeral ninia, hodi sira bele halo prosesa,” dehan nia.
Iha parte seluk, Diretor Servisu Edukasaun MunisÃpiu Likisa, Julio da Silva hatete, kona-ba asuntu diploma falsu ninia durante nee iha Likisa sira seidauk hetan informasaun kona-ba ida nee, tanba nee iha Likisa laiha.
(jac)
