DILI, STLTIMORLESTE.com – Servisu Edukasaun Munisipiu (SEM) Bobonaro identifika eskola 27 neebe lokaliza iha Munisípiu nee seidauk iha guarda eskola.
Diretor Servisu Edukasaun Munisípiu Bobonaro, Miguel Freitas dehan, dadus eskola neebe seidauk iha guarda nee hamutuk 27.
“Dadus nee mak ami identifika, lo-loos nee 24, maibe dadus ikus nee 27. Husi numeru nee kompostu nivel pre eskolar, ensinu baziku, sekundariu no ensinu tekniku vokasional, depois mak ami halo pedidu ba ME nasional. Tanba nee daudaun ami sei prepara hela dadus ida nee, ho nunee bele submete ba nasional,” esplika Diretor Servisu Edukasaun Munisípiu Bobonaro ba STL, liu husi telefone, Kinta (13/11/2025).
Iha fatin seluk, Diretor Servisu Edukasaun Munisípiu Manatuto, Patricio da Cruz Quintao dehan, eskola balun iha ona guarda eskola, maibe balun laiha. Tanba eskola sira iha area remotas nee barak seidauk iha guarda eskola.
Nunee mos Julio da Silva hanesan Diretor Servisu Edukasaun Munisípiu Likisa hatete, los duni katak, eskola neebe lokaliza iha Munisipiu Likisa nee balun iha guarda eskola no balun too agora seidauk iha guarda.
Jornalista: Jacinta Sequeira
Editora: Domingas Gomes
