DILI, STLTIMORLESTE.com – Institutu Defeza Nasionál (IDN) realiza serimonia graduasaun ba alunus nain 33, neebe durante nee partisipa formasaun iha IDN ba periodu tinan anu letivu 2024 too 2025.
Diretor Institutu Defeza Nasionál (IDN), Guilherme Soares dehan, alunus finalista nain 33 mai husi terseiru Kurus Estadu Maior konjunta integradu hamutuk nain 15, mai husi Superintendente Asistente Polísia nain 4, husi Polísia Nasionál Timor Leste (PNTL), Major, Kapitaun Tenente, Kapitaun Fragata hamutuk nain 11 husi Komando FALINTIL – Forsa Defeza Timor Leste (F-FDTL).
“Ohin nee ita taka sikul ida anu letivu 2024-2025 nian, no abertura fila-fali ba anu letivu sikul ida 2025 too 2026 ho Kursu rua, Kursu Estadu Maior konjunta intergradu ba terseiru edisaun nian, depois primeiru edisaun Kursu Maior no Kapitaun do portu nian, ida nee ohin ita ensera ona,” hatete Guilherme Soares ba jornalista sira iha Kuartel Jeneral F-FDTL Fatuhada, Dili, Kinta (20/03/2025).
Nia tenik, objetivu Jeral husi kursu nee atu perepara ofisial senior sira ho tékniku apoiu ba komando no desizaun neebe persiza atu ezerse funsaun komando no orgaun sira husi Estrutura Superior F-FDTL no PNTL.
Nia esplika, fornese sira nia vizaun jeral kona-ba realidade no buka atu esplora sira nia esperiensia konhesimentu sientífiku no teknika, akumula iha tinan hira nee, tanba sira nia dezempenhu kareira sira hodi asegura sistematizasaun konhesimentu ba dezenvolvimentu individual no aprendizajen neebe adekuadu ba dezempenhu funsaun sira iha futuru.
Iha fatin hanesan, Xefe Estadu Maior General FALINTIL – Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hatoo parabens ba IDN neebe fo formasaun kurus Estadu Maior konjunta interatadu, Major, Kapitaun Tenente no Kapitaun Fragata nee importante tebes ba Instituisaun F-FDTL nian.
“Hau haksolok no parabens IDN neebe fo formasaun, ita haree bazeia ba ita nia valor ita sente haksolok para futuru nee diak, tanba ema hanesan ami nee, ami preokupa ba estabilidade futuru nian, ami fiar tanba ho formasian sira hetan nee, buat hotu bele akontese, mais kuandu Forsa Seguransa Defeza metin, nee ita nia nasaun sei soberanu tebes,” nia afirma.
(jen)
