BAUKAU, STLTIMORLESTE.com – Idozu balu iha Suku Haeconi, Postu Administrativu Baguia, Munisipiu Baukau, balu la simu nia direitu, tanba laiha Bilhete Identidade (BI).
Xefe Suku Haeconi Luis Oliveira informa, prosesu pagamentu periodu nee ba benefisiariu idozu no kondisaun espesial sira iha Suku Haeconi, Postu Baguia realiza iha loron 06 Outumbru nee ho total benefisiariu nain 290 kompostu idozu no ema kondisaun espesial, maibe nain 2 labele hetan direitu, tanba nain ida simu ona osan pensaun veteranu nian no nain ida seluk laiha kartaun Bilhete Identidade.
“Osan nee ohin simu iha Sede Suku balu lahetan, tanba naran tama ona iha lista veteranus no ida seluk nee dehan falta dokumentu BI,” Luis informa liu husi telefone, Segunda (06/10/2025).
Lideransa Komunitariu nee katak, benefisiariu idozu ida neebe la simu nia direitu iha periodu hirak liu ba simu hela, maibe iha periodu fulan 3 nian nee labele simu tanba laiha kartaun BI.
Hanesan Autoridade Suku preokupa ho regras simu subsidiu nian, tanba idozu balun ho kondisaun saude la permite atu prezensa iha edifisiu Notariadu Baukau trata dokumentus sira hanesan BI no seluk tan, maibe iha prosesu pagamentu nee presiza dokumentus refere.
“Hanesan Autoridade ita preokupa, Sertidaun ami Autoridade mak ba trara mos diak, maibe ida BI nee nain rasik mak tenke ba, maibe kondisaun moras entaun notariadu mak hatene ida nee,” Luis sublina.
Xefe Suku Haeconi nee husu Servisu Notariadu Baukau atu lori atendementu BI, Sertidaun Nasimentu no seluk tan besik ba komunidade sira iha area remotas liu liu ema idozu no kondisaun espesial sira nunee bele iha dokumentus importante sira hanesan BI, Sertidaun Nasimentu no seluk tan hodi la prejudika iha prosesu pagamentu.
Too notisia nee publika STL seidauk hetan kofirmasaun husi parte Servisu Rejistu Notariadu Munisipiu Baukau, tanba okupadu.
Jornalista: Tomas Reis
Editora: Carme Ximenes
