BAUKAU, STLTIMORLESTE.com – Benefisiariu idozu no invalides hamutuk nain 371 iha Munisipiu Baukau seidauk simu direitu pensaun sosial ba faze dahaat tinan 2024 no faze dahuluk 2025.
Husi benefisiariu nain 371 kompostu feto mane neebe rejistu iha Postu Administrativu Kelikai Antigu hamutuk nain 51, invalides nain 3 no idozu nain 48, Postu Baukau Vila hamutuk nain 53, idozu nain 41 no invalides nain 12, Postu Baguia benefisiariu idozu nain 74.
Postu Laga idozu nain 52, Postu Matebian nain 37, idozu nain 36 invalides nain ida, Postu Kelikai nain 22, idozu nain 21 no invalides nain ida, Postu Venilale nain 35 idozu nain 33 invalides nain 2 no Postu Vemasi nain 47 idozu nain 41 no invalides nain 6.
Koordenador Institutu Nasional Seguransa Sosial (INSS) Munisipiu Baukau, Gil Ximenes Guzmão esplika, benefisiariu numeru refere seidauk simu direitu pensaun sosial, tanba durante prosesu pagamentu realiza iha nivel suku la marka prezensa ho razaun kondisaun moras.
Maibe INSS Munisipal submere ona dadus ba Banku Nasional Komersiu Timor Leste (BNCTL – sigla português) hodi prosesu tuir akordu estabelesidu.
“Akordu entre INSS ho BNCTL iha loron 13 Marsu 2025, BNCTL mak iha kompentensia delibera orariu pagamentu no responsavel ba prosesu pagamentu,” hateten Gil ba jornalista sira iha Vila Nova, Sesta (09/05/2025).
Nia sublina, husi benefisiariu neebe seidauk simu direitu pensaun sosial, INSS Munisipal submete ona dadus ba BNCTL iha inisiu fulan Abril 2025 hodi halo pagamentu ba benefisiariu sira.
Maibe tuir informasaun parte BNCTL hahu ona halo pagamentu ba benefisiariu sira iha Postu Administrativu Baukau Vila, bainhira remata sei kontinua ba Postu Administrativu seluk.
“Hau asesu informasaun husi Adjuntu BNCTL Baukau katak, parte Baukau Vila iha Buibau no Samalaria nian hahu ona no sei kontinua ba Postu seluk,” Gil akresenta.
Entretantu benefisiariu kompostu idozu no invalides iha Munisipiu Baukau hamutuk 15.343 neebe iha tinan 2025 Governu liu husi Ministeriu Solidariedade Sosial no Inkluzaun aloka orsamentu hamutuk milhões US$ 6 resin.
(tom)
