DILI, STLTIMORLESTE.com – The International Finance Corporation (IFC) no Associação Empresarial das Mulheres de Timor Leste (AEMTL) parseria ho Governu Australia no Governu Nova Zelandia, organiza premiu Feto Emprendedora TL 2024.
Prezidente AEMTL, Hergui Luina Fernandes Alves liu husi diskursu iha salaun Multi Uzu Bebora, Tersa kalan (19/11/2024) hatete, lori empreza AEMTL nia naran agradese ba parte hotu nia prezensa hodi selebra manan nain ba premiu feto emprendedora TL 2024.
“Premiu Feto Emprendedora TL 2024 nuudar premiu dahuluk no sei halao tinan-tinan, atu selebra no rekonhese feto sira nia exelensia iha sira nia vida negosiu, sira nia luta rezelente atu hasoru dezafiu sira no persistensia atu alkansa sira nia mehi hodi susesu iha vida emprezarial, sira nia abilidade hodi jere no lidera empreza sira, no sira nia esforsu atu fortalese empodera maluk feto seluk,” katak nia.
Nia hatete, premiu ida nee atu fo konhesimentu selebra, no motiva feto sira atu hamriik no hakat nafatin ba oin nomos fo inspirasaun ba sira seluk, tanba luta ba empoderamentu feto laos esforsu uniku ema ida nia, maibe presiza hotu-hotu nia kontribuisaun.
Nia mos hatoo agradese ba PR Horta neebe aseita sira nia proposta nuudar patrocinador ka aman sarani ba eventu ida nee.
Hergui Luina mos hatoo parabens ba Feto Manan sira neebe ho kategoria 5 no sub kategoria 11 ba eventu ohin kalan.
Nunee mos Prezidente Republika dehan, ba sira neebe manan premiu ohin nee mai husi juri sira neebe halo kriteria diak, merese fo parabens.
PR Horta hatete, impaktu ba ekonomia, se ekonomia lao la diak feto sira neebe vulneravel liu laiha istorikamente iha preveleiju halo bisnis mak sofre liu.
“Ba Hau komitmentu ba direitu feto sira nia, iha Prezidensia iha feto 3 neebe hirarkia boot liu iha Prezidensia mak nee Xefe Kasa sivil, Visi Xefe Kaza Sivil, no Xefe Administrasaun hirarkia neebe boot iha presidensia,” nia tenik.
Nunee mos Reprezentante Internasional Finance Corporation IFC iha TL, David Freedman liu husi diskursu dehan, Governu TL foti inisiativa hodi define enkuadramentu legal atu promove igualdade no iha mos inisiativa lubuk ida inklui deklarasaun Maubesi, maibe husi nia presfektiva katak labele atinzi igualdade ho lei, karik hakarak atinzi presiza inisiativa no asaun neebe foti husi ema.
Baze legal bele define kria kondisaun maibe ema la brani, entaun sei nafatin. Ho nunee IFC ho nia objetivu promove igualdade iha nasaun oin oin foti inisiativa iha TL hamutuk ho parseiru AEMTL ho Embaixador Australia Embaixador Nova Zelandia hodi hamosu serimonia premiu ida nee hodi rekoinese ema neebe brani foti inisiativa, feto neebe hatudu katak feto mos bele, nunee futuru bele inspira feto tuir mai.
(eme)
