DILI, STLTIMORLESTE.com – International Federation of Red Cross and Red Crescent Societies (IFRC) kontinua apoia Timor Leste (TL) liu husi Cruz Vermelha Timor Leste (CVTL) iha area asistensia umanitaria.
Hafoin remata enkontru ho Primeiru Ministru (PM), Kay Rala Xanana Gusmão, Sesta (22/11/2024), iha Palasiu Governu, Sekretariu Jeral IFRC, Jagan Chapagain reafirma sira kontinua apoia TL iha area asistensia umanitaria liu husi CVTL.
“Ami hasoru Xefe Ezekutivu hodi koalia asuntu barak, maibe ami koalia liu kona-ba area umanitaria, no PM iha enfaze dala wain liu haree ba dezenvolvimentu juventude, liu-liu atu halo mudansa hanoin, ideia atitude. Liu-liu mos joven sira nia papel ba dezenvolvimentu nasaun”, hatete Jagan Chapagain.
Federasaun Internasional Cruz Velmelha tuir Jagan Chapagain katak, servisu besik ho CVTL atu bele haree area asistensia umanitaria nian liu-liu situasaun emerjensia, saúde, juventude, bee-moos no área sira seluk neebe liga direta ho komunidade.
Entretantu Prezidente CVTL, Madalena Hanjam afirma, Cruz Vermelha Internasional apoia umanitaria bá TL dezde tinan 1975 mai too agora.
“Iha 2005 CVTL hamriik nuudar organizasaun ida no sai ona membru ba federasaun. Apoiu neebé Cruz Vermelha Timor Leste halo ba populasaun mak dada bee-moos, juventude, mobilizasaun doasaun raan no seluk tán”, dehan nia.
Nia dehan, juventude Timor Leste ho voluntariu iha CVTL besik rihun rua, maibe numeru nee la fiksu tanba balu tama no balu sai.
(gui)
