VEMASI, STLTIMORLESTE.com – Institutu Gestaun Ekipamentus (IGE) loke estrada foun hamutuk kilometru (Km) 15 husi Suku Kaikua too Uaigae, iha Postu Administrativu Vemasi, Munisipiu Baukau.
Xefe Suku Kaikua, Anibal Henrique da Costa hateten, inisiativa husi estrutura Suku sesante iha Kaikua no Uaigae neebe submete pedidu ba IGE atu loke estrada foun husi Kaikua too Uaigae konsege hetan aprovasaun nunee iha tinan kotuk IGE hahu loke estrada foun refere, maibe too deit kilometru 3 balun no retira ba fali Suku seluk, tanba bazeia ba pedidu emerjensia neebe parte IGE prezisa atende sedu.
Maibe iha tinan nee parte IGE prezensa hikas iha Postu Vemasi hodi kontinua loke estrada foun refere, tanba bazeia ba Autoridade Suku atual.
“IGE mai kontinuasaun liga dala husi Suku Kaikua too iha Suku Uaigae nia distansia kilometru 15 agora dadaun sira iha faze loke too tiha ona Suku Uaigae,” hateten Anibal ba jornalista sira iha Kaikua Vemasi, Kuarta (23/07/2025).
Nia sublina, programa loke estrada foun husi Kaikua too Uaigae remata ona no dadaun pezadu husi IGE kontinua destaka iha terenu hodi normaliza dalan sira neebe risku ba movimentu transporte sira.
Nia fundamenta, programa loke estrada foun refere bele fasilita ona komunidade sira nia movimentu husi Suku Uaigae ba Kaikua liu husi utiliza transporte publiku no privadu, tanba antes nee komunidade sira utiliza deit kuda sai transporte hodi lori sai produtu lokal sira husi Uaigae asesu merkadu iha Vemasi.
“Liu husi estrada neebe halo dadauk hau hanoin bele fasilita ona ita nia komunidade sira neebe mak durante nee uza deit kuda, agora bele fasilita ona lori produtu ba merkadu,” Anibal akresenta.
Autoridade Suku nee informa, dalan foun refere fo asesu mos Suku vizinhu sira hanesan Aldeia Oralan Suku Vemasi Tasi, Uaitulari, Ossouala, Loilubu inklui Kaikua no Uaigae, tanba nee konsidera hanesan estrada alternativu.
Entretantu pedidu neebe submete ba IGE hodi responde no loke estrada foun refere, tanba bazeia ba uma kain hamutuk 246 husi Aldeia Oralan Suku Vemasi Tasi, Uaigae no Kaikua rasik neebe durante nee la asesu estrada.
(tom)
