DILI, STLTIMORLESTE.com – Komunidade Crista AGAPE fasilita konsulta gratuita ba populasaun sira iha Aldeia Laloran, Suku Bairo Pite, Minisipiu Dili.
“Hau haksolok tebes tanba ami hamutuk ho Ministeriu Saude ho doutor sira husi Singapura, fo konsulta gratuita ba ita nia sidadaun sira iha iha nasaun nee,” hatete Pastor Nilton Lima iha Igreja Crista AGAPE, Aldeia Laloran, Tersa (19/11/2024).
Nia hatutan, durante loron rua halao tratamentu saude ba populasaun sira, moras neebe doutor sira identifika husi populasaun barak mak sofre hela moras rins, TBC, Asma inklui moras sira seluk tan.
Tanba nee nia dehan, tratamentu gratuita neebe halao dezde loron Segunda (18/11) no sei termina iha loron Tersa (19/11), ba oin sei halo relatoriu ida atu aprezenta ba Ministeriu Saude hodi halo analiza ida.
Nunee Igreja Crista AGAPE ho doutor espesialista sira iha loron Kuarta (20/11) sei halao konsulta gratuita ba populasaun sira iha Minisipiu Manatuto no planu ba too Postu Laklubar.
(alb)
