DILI, STLTIMORLESTE.com – Grupu Komisaun Pastoral ba Imigrante husi Konferensia Episkopal Bispu Korea kontinua servisu hamutuk ho Governu Timor Leste, hodi kontinua apoiu Timor oan iha Korea.
Kestaun nee hatoo husi Padre Jhon Youn ba jornalista sira iha Palasiu Prezidensial Nicolau Lobato, Bairo Pite, Tersa lokraik (14/10/2025) hatete, Igreja Katolika Korea kontinua servisu hamutuk ho Governu Timor Leste hodi haree ba Timor oan iha Korea.
“Ami hakarak hatoo ami nia gratidaun ba Prezidente Republika neebe fo benvindu ba ami ho fuan no laran nakloke, ami mos promete atu servisu hamutuk nafatin ho Governu Timor liu husi Prezidente Republika hodi kontinua akompanha Timor oan sira iha Korea, iha dalan neebe Igreja Katolika bele halo liu husi buat neebe ami halo ona tinan naruk nia laran kontinua fo suporta normal, espiritual no buat selu-seluk tan, nunee bele akompanha sira iha servisu fatin,” dehan Padre.
Pozisaun uma kreda iha Korea trata trabalhador sira, hatan ba kestaun nee Padre hatete, pozisaun Igreja trata ema hotu hanesan.
Padre dehan, pozisaun Kreda Katolika Korea nian mak nee, trata ema hotu hanesan atu iha dokumentu legal ka sira neebe laiha dokumentu mos uma Kreda nia oin laiha liafuan ida ilegal.
“Nunee ami Padre sira, hau neebe Timor oan iha Korea, ami trata sira atu dokumentu iha ka laiha ema nee Timor oan nia iha dignidade, ami servi sira hanesan deit. Labele diskrimina ema ida tanba deit nia laiha dokumentu ka viza, nunee pozisaun Kreda nian klaru, ami sempre tau matan ba ema hotu-hotu atu iha dokumentu ka laiha dokumentu mos Kreda nia servisu mak nee hakuak ema hotu, bainhira hetan moras, difikuldade, problema Igreja iha Korea atu ajuda,” nia haktuir.
Nia haktuir, iha mos kazu balun maluk sira neebe laiha dokumentu neebe legál, maibe bainhira sira moras tama iha hospital sira laiha asuransia ba saude.
Tanba nee bainhira trabalhador sira moras, sira nia kustu hospital nee labele koa husi buat neebe sira bolu seguransa sosial nian.
Nune’e Kreda Katolika Korea liu husi amu sira sempre buka ajuda ema sira nee, entaun Kreda Katolika Korea husi dioseze 16 reprezentante deit mak iha nee.
Maibe sira servisu makaas hodi tau matan ba ema neebe iha dokumentu ka laiha dokumentu, bainhira sira moras amu sira iha Korea hodi bele trata sira nuudar umanu.
Jornalista: Emerenciana Pinto
Editor: Xisto Mendonça
