BAUKAU, STLTIMORLESTE.com – Igreja Katolika São Jose Operari Ossolia, iha Suku Letemumu, Postu Administrativu Kelikai, Munisipiu Baukau, hetan estragus tinan 20 resin ona, maibe seidauk halo reabilitasaun.
Koordenador Igreja São Jose Operari Ossolia, Lorenco Orlando Gusmão haktuir, sarani Ossolia Kelikai, iha tempu okupasaun Indonezia laiha Uma Igreja modelu hada’a bataku no taka kalen, maibe tanba fiar no distansia tuir misa loron Domingu no misa Santu seluk tan ba Postu Kelikai Vila lao ain distansia kilometru 6 resin, nunee iha fulan Novembru 1988, sarani Katolika Ossolia, Uaidora no Manume foti insiativa tesi ai hodi konstrui Igreja iha Ossolia, nunee iha loron Domingu no misa Santu seluk tan bele hasae orasaun ba Maromak ho besik liu tan.
Nunee iha tinan 1988 sarani sira konsege harii uma Igreja ho material konstrusaun tradisional no konsege uza too tinan naruk. Maibe iha fulan Agostu 1994, iha misa Domingu konsege prezide husi Dom Carlos Filipe Ximenes Belo neebe fo korajen ba sarani sira kontribui osan hodi hadia iha tinan 1997 halo kedas konstrusaun Igreja Ossolia neebe hetan apoiu mos husi Parde matebian João de Deus.
Maibe iha tinan 2002 mosu fenomena anin boot husi tasi feto konsege sobu hodi estragus uma Igreja refere, neebe kauza satan ou tongka deit kanu tahan iha fatin 8 hodi satan kalen no ai iha uma leten labele monu no kontinua fo mahon ba sarani no Amu selebrante sira husi tinan 2002 too ohin loron.
“Nee anin mak sobu iha 2002 nee mak Padre João de Deus lori torneira mai tongka deit too ohin loron, tanba ami laiha kapasidade atu konstrui ami nia Igreja ida nee,” hatete Lorenco ba jornalista sira iha Ossolia, Kuarta (12/03/2025).
Nia argumenta, relasiona kondisaun Uma Igreja refere, nia parte hatoo ona ba parte Parokia Santa Terezinha Kelikai maibe la hatan, tanba katak Igreja refere Igreja lokal, nunee responsabiliza husi sarani sira iha Ossolia, Uaidora no Manume.
Nia sublina, kona-ba sarani sira husi Ossolia, Uaidora no Manume mak atu responsabiliza hodi halo reabilitasaun la iha kbiit, tanba maioria moris vida agrikultura.
“Too ohin loron kalen sira taka iha uma leten kontinua monu, nee fo ameasa ba ami nia vida, maibe Padre sira mai Domingu-Domingu ami nafatin uza halo selebrasaun misa,” haktuir Lorenco.
Koordenador Igreja São Jose Operari Ossolia nee sujere ba Parokia atu seriu haree kondisaun uma Igreja refere, tanba bainhira mosu anin no udan boot iha tempu misa nian fo impaktu ba sarani sira nia vida, tanba Uma Igreja refere daudaun kondisaun aat neebe tongka deit ona ho torneira iha fatin 8.
Xefe Aldeia Uaidora Suku Letemumu, Pascoal Domingos Gusmao Belo hatete, kondisaun Igreja Ossolia daudaun ameasadu atu monu, tanba nee husu parte relevante atu halo reabilitasaun, nunee labele fo impaktu ba ema nia vida.
“Igreja Ossolia grave tebes ona, tanba Amu sira mai halo misa mak akontese udan, ami laiha atensaun rona, tanba tauk, ai neebe prega kalen iha leten mos balun dodok ona,” haktuir Pascoal.
Enkuantu observasaun STL nian iha terenu nota katak, kalen neebe taka iha uma Igreja leten kuaze barak mak monu no daudaun udan bee tama hodi naliun iha Igreja laran.
Entretantu Igreja São Jose Operari Ossolia iha misa loron Domingu no misa Santu seluk tan utiliza husi sarani sira iha Ossolia, Uaidora, Manume no Suku Abu inklui Bualale sorin.
(EST 1)
