DILI, STLTIMORLESTE.com – Igreja Parokia Letefoho daudaun nee sarani sira preparadu misa hodi simu Kadaver Amu Domingos Maubere no sei maktoban iha Parokiia Letefoho loron ida.
“Ita nia sarani sira iha Parokia Letefoho agora perparadu hodi hein Amu Du, too iha neeba hafoin Parokia Letefoho sei organiza komunidade husi suku sia mai hatudu sira nia domin ba Amu,” hatete Pedre Elio Pereira Fernandes husi Parokia Letefoho ba jornalista sira iha sala Mortuariu HNGV, Sesta (16/05/2025).
Nia dehan, orariu neebe Deoseze foti nee Igreja Parokia Letefoho iha ona, tanba Amu Cardial Dom Virgilio do Carmo nia desizaun sei matebian Padre Domingos Maubere sei lori fila-fali mai iha Dili.
Nia esplika, antes ne’e Arsebispu Metropolitana Dili, Dom Virgilio Cardeal do Carmo da Silva, SDB ho familia enkontru hamutuk atu nunee kria komunikasaun neebe diak ho Igreja, Parokia ba Padre Domingos Maubere nia misa iha Igreja Katedral no ikus ninia funebre.
Nia tenik, husi enkontru nee Amu Cardial ho fuan no atesaun tomak hodi rona familia sira nia preokupasaun no rona familia nia hanoin oinsa Padre Domingos Maubere hetan fatin kalan ida hamutuk ho Sarini tomak iha Letefoho.
“Amu Cardial fuan boot, rona ho atensaun no hatan ba proposta ida nee, entaun horiseik desidi katak Pedre Domingos Maubere bele ba hamaluk ita nia sarani Letefoho kalan ida, orsida ita sei desloka husi Dili uza aviaun nebee hetan apoiu husi Timor Gap,” nia informa.
Nia koalia, Matebian Domingos Maubere too iha Igreja Parokia sei halo abertura ho misa depois sei ensera fila-fali ho misa iha loron aban nian.
“Ami halo ona orariu katak, misa belada 24 oras iha Parokia Letefoho,” nia deklara.
Iha fatin hanesan, sarani husi Parokia Santa Terezinha do Menino Jesus Ossu, Rosa Guterres Monteiro sente lakon amu Lulik diak, hanesan Padre Domingos Maubere, tanba durante nee Padre Domingos halao knaar durante tinan sia iha Suku Ossu desima, Postu Administrativu Ossu Munisipiu Vikeke.
“Hafoin rona novidades katak Amu Domingos Maubere la iha ona iha mundu, hau sente hakfodak no hanoin durante nia halao misaun iha Ossu tinan sia nia laran,” nia esplika.
Nia hatutan, hanesan sarani hanoin tomak nia hahalok neebe durate nia halo mai sarani sira Ossu, ”Hau hanoin Amu Du tanba nia hahalok diak no nia gosta los Ossu ,” nia argumenta.
Nia konta, durante nee Padre Domingos Maubere hatudu hahalok diak tebes iha sarani sira nia leet, no hanorin sarani sira oinsa mak hadomi ema seluk tuir Nai Maromak nia ukun fuan.
“Amu nia hahalok diak tebes, nia siak mos nia laran moos ba labarik, joven, feto no mane no nia hadomi sarani hotu no Amu Du matenek los nia jeitu atu hanesan ho Amu Manuel Luís. Ami Ossu sente lakon boot Amu lulik di’ak liu. Amu Du di’ak liu hanorin ema oinsá mak hadomi labarik, joven, ferik, katuas no tama sai uma haree sarani sira”, nia konta.
Nunee mos Sarani Teresa do Santos husi Parokia Letefoho hateten, sente lakon boot, tanba Amu Du iha tempu Indonezia lori joven sira husi fatin ba fatin seluk nian lakohi ema ida lakon iha nian liman laran no buat hotu-hotu nian halo too Timor ukun aan.
“Hafoin nia halao servisu husi fatin ida ba fatin seluk no husi Parokia ida ba Parokia seluk, maibé nia nafatin halo buat neebe mak nia halo realidade Sarani sira sente duni, maske tempu susar no terus nia laran maibé nia kontínua halo nia servisu hanesan Maromak nia bibi atan no manu-ain hodi servi sarani tomak maibé nia la sura kolen. Durante Amu Du moris kumpri duni hanesan Maromak na’in saseluk”, nia haktuir.
Nia deklara, dala ruma tempu ne’ebé mak susar tebes-tebes maibe nia kontínua enkoraja joven sira kontínua reza ba rai ida nee, maske tempu neeba susar tebes-tebes, maibé nia kontínua lori joven sira tuir Kruzada, tuir joven ba kristu, tanba ida nee hanesan sarani la bele haluha.
(jen)
